كۆمسیۆنا هه‌لبژارتنان هوشداريێ دده‌ته به‌ربژاران
ئه‌ڤرۆنيوز:
ل دۆر هه‌وا هه‌لبژارتنان بۆ قه‌واره وبه‌ربژاران، كۆمسيۆنا بلند يا هه‌لبژارتنان ل عيراقێ هوشداريێ دده‌ت وب رێيا فه‌رمانگه‌هه‌كا تايبه‌ت ڤه چاڤدێريا هه‌وا هه‌لبژارتنان يا قه‌وارێن سياسى دكه‌ت.
رزگار حاجى حه‌مه، جێگرێ سه‌رۆكێ كۆمسيۆنا هه‌لبژارتنان ل عيراقێ راگه‌هاند” هه‌ر قه‌واره‌كى وبه‌ربژاره‌كى بۆ هه‌يه دچارچۆڤێ رێنمايێن كۆمسيۆنێ دا، هه‌وا خوه يا هه‌لبژارتنان بكه‌ن ب وى مه‌رجى ناڤزراندن تێدا نه‌بيت ول جهێ نه هه‌ژى ژى پۆسته‌ران نه‌هه‌لاويسن وجهێن گشتى وئايينى وحكومى ژى بكارنه‌ئينن، هه‌ر كه‌سه‌ك ل ده‌رڤه‌ى وان رێنمايان هه‌وا هه‌لبژارتنان بكه‌ت، دێ سزايێن دارايى وقانوونى ل سه‌ر هێنه سه‌پاندن”.
ناڤبرى دداخۆيانيه‌كا رۆژنامه‌ڤانى دا زێده‌تر گۆت” ب رێيا فه‌رمانگه‌ها په‌يوه‌نديێن جه‌ماوه‌رى يا سه‌ر ب كۆمسيۆنێ ڤه دێ چاڤدێريا هه‌موو كه‌نالێن فه‌رمى وده‌زگه‌هێن راگه‌هاندنێ وتۆرێن جڤاكى كه‌ين، ژبۆ وێ چه‌ندێ قه‌وارێن سياسى وبه‌ربژار ژرێنمايان ده‌رنه‌كه‌ڤن”.
دياركر” هه‌ر قه‌واره‌كێ سياسى ژنوكه ده‌ست ب هه‌وا هه‌لبژارتنان دتۆرێن جڤاكى دا ده‌ست پێ بكه‌ت وهژمارا قه‌واره‌ى دياركربيت، دێ راسته‌وخوه ئاگه‌هداركه‌ين كو پێشێلكارى يا كرى، به‌لێ هه‌تا نوكه چو قه‌واره‌كێ سياسى ده‌ست ب هه‌وا هه‌لبژارتنان ب هژمارا قه‌وارێ خوه نه‌كريه”.
ئاماژه دا ژى كو كۆمسيۆن تنێ رێكارێن قانوونى وسزايا دارايى يا قه‌واره وبه‌ربژاران كه‌ت كو ئه‌وژى ژ ئێك مليۆن ديناران ده‌ست پێ دكه‌ت هه‌تا 50 مليۆن ديناران.
