كۆمسیۆن: هیچ بەربژارەكێ پارتی ژ هەلبژارتنان نەهاتییە دوورئێخستن
كۆمسیۆنا بلند یا سەربخوە یا هەلبژارتنان ل ئیراقێ راگەهاند، هیچ بەربژارەكێ پارتی بۆ هەلبژارتنێن پەرلەمانێ كوردستانێ ل سنوورێ پارێزگەها دهۆكێ نەهاتییە دوورئێخستن.
د. عیماد جەمیل، سەرۆكێ تیما رۆژنامەڤانییا كۆمسیۆنا بلند یا سەربخوە یا هەلبژارتنان ل ئیراقێ گوت» جڤاتا كۆمسیاران ل كۆمسیۆنێ هیچ بڕیارەك بۆ دوورئێخستنا هیچ بەربژارەكێ پارتی دیموكراتی كوردستان و بەربژارێن حزبێن سیاسی یێن دی ژی ژ هەلبژارتنێن خولا شەشێ یا پەرلەمانێ كوردستانێ، دوورنەئێخستینە».
پارتی دیموكراتی كوردستان، ل بازنەیا پارێزگەها دهۆكێ و ئێدارەیا سەربخوە یا زاخۆ، 48 كەس بۆ هەلبژارتنێن خولا شەشێ یا پەرلەمانێ كوردستانێ بەربژار كرینە، هندەك دەنگوباس وەسا هاتبوونە بەلاڤكرن كو بەربژارەكێ پارتی ژ ئەگەرێ ئەوێ چەندێ كو ژ دایكبوویێ دەڤەرەكا سەر ب مادەیێ 140 ڤەیە، ژ هەلبژارتنان هاتییە دوورئێخستن».
ژێدەرەكی ژ مەكتەبا دهۆكێ یا رێكخستنا پارتی دیموكراتی كوردستان بۆ كوردستان 24 دیاركر» ل رۆژا پێنجشەمبییا بۆری 18/7/2024، ناڤێن 48 بەربژاران هاتییە رادەستكرن بۆ لقێ دهۆكێ یێ كۆمسیۆنا بلند یا سەربخوە یا هەلبژارتنان ل ئیراقێ و نوكە دەستەیا قانوونی و دەستپاكی و پشكێن دی یێن كۆمسیۆنێ ل بەغدا، هووربینیێ بۆ ناڤێن بەربژارێن پارتی و ناڤێن بەربژارێن حزبێن دی ژی دكەن، دبیت ئەو پڕۆسەیە حەفتییەكا دی ژی ڤەكێشیت، هەتا نوكە كۆمسیۆنێ هیچ بەربژارەكێ پارتی نە دوورئێخستییە».
ل دووڤ هەمان ژێدەر» هەكە كێشەیەكا قانوونی ژی ل دەف بەربژارەكێ پارتی دیموكراتی كوردستان بۆ هەلبژارتنێن خولا شەشێ یا پەرلەمانێ كوردستانێ هەبیت، ب هەماهەنگی ل كۆمسیۆنا بلند یا سەربخوە یا هەلبژارتنان ل ئیراقێ دێ بزاڤا چارەسەركرنا كێشەیێ كەین».
ب گۆڕەی رێنمایێن كۆمسیۆنا بلند یا سەربخوە یا هەلبژارتنان ل ئیراقێ، هەر لیستەكا پشكدار د هەلبژارتنێن پەرلەمانێ كوردستانێدا، دشێت دو هندە كورسیێن هەر پارێزگەهەكێ بەربژار بۆ هەلبژارتنان هەبیت و پارتی ژی بۆ ئەڤان هەلبژارتنان 190 بەربژار یێن هەین.
