كۆچبه‌رێ سووری یێ كه‌ڤتیه به‌ر به‌رپێكا وێنه‌گرا هنگاری تیرۆرست بوو
ئه‌ڤرۆنیۆز، ئه‌یاد به‌روارى:
ئوسامه عه‌بدولموحسن ئه‌و كۆچبه‌رێ سووری یێ كو ل ده‌ستپێكا ڤێ مه‌هێ وێنه‌گرا كه‌ناله‌كێ هنگارى په‌رپێكه‌ك دایێ ل سه‌ر سنۆرێ هنگاریا ل گه‌ل سربیا و گرته‌یا وێ په‌رپێكێ ل جیهانێ ده‌نگڤه‌دای، ل دووڤ گوتاره‌كێ كو د مالپه‌رێ فه‌رمیێ (په‌یه‌دێ) دا هاتیه به‌لاڤكرن، ئوسامه ئه‌ندامێ به‌ره‌یێ نوسرێ یێ تیرۆرستی بوو كو ب سه‌ر رێكخراوا قاعیده یا تیرۆرستی ڤه‌یه و تاوان ژی دژى كوردان ئه‌نجامداینه.
ئیبراهیم ئیبراهیم د گوتاره‌كێ دا ل مالپه‌رێ فه‌رمیێ په‌یه‌دێ دبێژیت” ئوسامه عه‌بدولموحسن راهێنه‌رێ یانا فتوه بوو ل سالا 2004 ێ و چه‌ندین وه‌لاتیێن كوردێن سووری دیده‌ڤانن كو ئه‌و كه‌سه ئه‌گه‌رێ سه‌ره‌كیێ شه‌هیدبوونا 60 وه‌لاتیێن كورده و پشكدارى د كوشتنا وان دا ژی كر ده‌مێ پۆلیس و ده‌زگه‌هێن ئه‌منی یێن به‌عسی یێن سووری هانداین كو هێرشێ بكه‌نه سه‌ر جه‌ماوه‌رێ یانا جیهاد یا كوردی ل یاریگه‌ها قامشلی ل 14 ئادارا 2004 ێ و جڤین ژی ب گه‌لێ كورد ددان و پاشی ئه‌و روودانه بۆ ئه‌گه‌رێ هه‌لبوونا سه‌رهلدانا كوردی ل قامشلی و چه‌ندین ده‌ڤه‌رێن كوردی ڤه‌گرت”.
ئیبراهیم د گۆتارا خوه ئاشكرا دكه‌ت كو پشتى هه‌لبوونا شوره‌شا سووری ل سالا 2011 ێ كو ب مخابنی ڤه هزاره‌ها به‌عسیێن عروبه‌وی وه‌كو (ئوسامه عه‌بدولموحسن) پالدان ل گه‌ل گرۆپێن تیرۆرستی كار بكه‌ن، چ یێن سه‌ر ب رێكخراوا قاعیده ڤه وه‌كو ( به‌ره‌یێ نوسره) یان ژی رێكخستیا (داعش) و جاره‌كا دى وان هزاره‌ها به‌عسیان شه‌ڕ دژی گه‌لێ كورد دكر ل سه‌رى كانیێ و كۆبانی و عه‌فرینێ”.
دبێژیت ژی” ل دووڤ وان ئاخڤتن و وێنێن ئوسامه عه‌بدولموحسنی یێن مه ب ده‌ستخوه‌ڤه ئینانین ژ چه‌ندین وه‌لاتیێن كورد، دیار دبیت كو پێدڤیه ڤه‌كۆلین د پرسا ئه‌ندامه‌تیا وی د به‌ره‌یێ نوسره یێ تیرۆرستی دا بهێته كرن كو هه‌تا به‌ری ده‌ركه‌فتنا وی ژ سووریێ ب ده‌مه‌كی كێم ئه‌ندامێ وی گرۆپێ تیرۆرستی بوو، و پشكداری ل گه‌ل گرۆپێن تیرۆرستی دا د شه‌ڕێ دژى گه‌لێ كورد دا كریه و پشتی بارودۆخێ ئه‌منی تێكچووی و ژ ترسا ئاشكراكرنا وی وه‌كو ب سه‌دان تیرۆرستێن دی، بریارا ڕه‌ڤینێ ژ سووریێ دده‌ت كو ل گه‌ل وان گرۆپان ل (گرێ سپی) بوو به‌ری ئه‌و ده‌ڤه‌ر ژلایێ په‌یه‌دێ ڤه بهێته رزگاركرن”.
