كۆچكا سپی پێشوازیێ ل پشكداریا نێچیرڤان بارزانی د دانوستاندنێن قەتەرێ و ئیراقێ دا دكەت
كۆچكا سپی پێشوازیێ ل پشكداریا نێچیرڤان بارزانی، سەرۆكێ هەرێما كوردستانێ د دانوستاندنێن د ناڤبەرا قەتەرێ و ئیراقێ دا و بزاڤكرن بۆ چارەسەركرنا كێشەیێن د ناڤبەرا بەغدا و هەولێرێ دا، دكەت.
ئادەم هۆدج، پەیڤدارێ جڤاتا ئاسایشا نەتەوەیی یا ئەمریكی د پەیامەكێ دا ڕاگەهاند» ئەم پێشوازیێ ل سەرەدانا ڕۆژا 15 خزیرانێ یا میرێ قەتەرێ شێخ تەمیم بن حەمەد ئال سانی بۆ بەغدا دكەین و ئەمریكا ب تمامی پشتەڤانیێ ل سەروەریا ئیراقێ و سەربخوەییا وێ و بەرفرهەكرنا پەیوەندیان ل جڤاتا هاریكاریا كەنداڤی و دەڤەرا ئەرەبی دكەت».
هەروەسا گوت» ئەم پێشوازیێ ل پشتەڤانیا كارا یا شێخ تەمیم بن حەمەد ئال سانی، میرێ قەتەرێ و محەمەد شیاع سۆدانی، سەرۆك وەزیرێن ئیراقێ و سەركردەیێن دی یێن دەڤەرێ و گەلێ ئیراقێ دكەین، هەروەسا پێشوازیێ ل پشكداریا نێچیرڤان بارزانی، سەرۆكێ هەرێما كوردستانێ دكەین د وان دانوستاندنان دا بۆ زێدەتر بلندكرنا هەماهەنگیێ د ناڤبەرا بەغدا و هەرێما كوردستانێ دا».
وێ پەیامێ پشتەڤانی بۆ پێنگاڤێن ئیراقێ د بوارێن پیشەسازی و وزێ و هاریكاریا ئیراقێ ل گەل وەلاتێن كەنداڤی دیاركر.
