كێشه ل عيراقێ ب گوهۆڕينا سه‌روچاڤان ناهێنه چاره‌كرن
هه‌ولێر، قائید میرۆ
بۆ حه‌فتیا دویێ خوه‌نیشادان و ئالۆزیێن عیراقێ د به‌رده‌وامن و حوكمه‌تێ ژی چه‌ندین بڕیارێن بله‌ز بۆ ڤه‌مراندنا ئاگرێ خوه‌نیشادانان ده‌ركرن، نوونه‌ره‌كێ كورد ژی دبێژیت، ئاریشێن نوكه عیراق تێدا ده‌رباز دبیت، میراتێ كابینێن به‌رێ یه و پێدڤیه چاره‌سه‌ری بۆ بهێته دیتن.
پشكه‌كا لایه‌نێن سیاسی و لێڤه‌گه‌رێن بلندێن شیعان داخوازا پێكئینانا حوكمه‌تا ده‌مكی دكه‌ن، هه‌تا پڕۆسا هه‌لبژارتنێن به‌روه‌خت بهێته ئه‌نجامدان، به‌لێ د هه‌مبه‌ر دا هنده‌ك لایه‌نێن سیاسی هه‌لبژارتنێن به‌روه‌خت ب چاره‌سه‌ر نابینن بۆ ره‌وشا ئالۆزا عیراقێ و دخوازن لایه‌نێن سیاسی ئێك هه‌لویستبن ل هه‌مبه‌ر ره‌وشا عیراق ڤه‌گرتی و چاره‌سه‌ریێن بله‌ز ڤه‌بینن.
دانا جه‌زا، په‌رله‌مانتارێ فڕاكسیۆنا پارتی ل په‌رله‌مانێ عیراقێ بۆ رۆژناما ئه‌ڤرۆ گۆت: زه‌حمه‌ته كۆمبوونا په‌رله‌مانێ عیراقێ لدۆر ره‌وشا نوكه و رێڤه‌چوونا خوه‌نیشادانان سه‌ر بگریت، چونكی هژماره‌كا كوتلێن مه‌زن یێن په‌رله‌مانی ئه‌ندامه‌تیا خوه هه‌لپه‌سارت و پشكداری كۆمبوونێن په‌رله‌مانی نابن، به‌لێ په‌رله‌مانێ عیراقێ یێ به‌رده‌وامه ل سه‌ر بزاڤێن خوه، بۆ ب دووماهی ئینانا ره‌وشا ئالۆزا عیراقێ و بجهئینانا داخوازیێن خوه‌نیشاده‌ران، كوتلێن ناڤا په‌رله‌مانی ل دۆر ره‌وشا نوكه‌یا عیراقێ كۆمبووینه و سه‌رۆكێ په‌رله‌مانی ژی ل گه‌ل نوونه‌رێن خوه‌نیشاده‌ران ب مه‌ره‌ما دیتنا چاره‌سه‌ریه‌كێ و دوماهی ئینان ب ئالۆزیان كۆمبوویه.
عادل عه‌بدولمه‌هدی سه‌رۆك وه‌زیرێن عیراقێ هژماره‌كا بڕیارێ بله‌ز ده‌ركرینه، ب مه‌ره‌ما بجهئینانا داخوازیێن خوه‌نیشاده‌ران ژوان ژی به‌لاڤكرنا پارچێن ئه‌ردی ل سه‌ر وه‌لاتیان و ئاڤاكرنا یه‌كه‌یێن ئاكنجیبوونێ بۆ وه‌لاتیێن هه‌ژار و به‌لاڤكرنا مینحه‌یه‌كێ هه‌یڤانه ل سه‌ر وه‌لاتیێن چو ژێده‌رێن ژیانێ نه‌بن، سه‌رۆك وه‌زیرێن عیراقێ هه‌ڤده‌م سۆزا ئه‌نجامدانا چاكسازیێ و گرنگیدان ب كه‌رتێن ژیانێ وه‌لاتیێن عیراقی دایه.
دانا جه‌زای ئاماژه دا، هه‌لبژارتنێن به‌روه‌خت چاره‌سه‌ریا ئاریشێن عیراقێ ناكه‌ت، چونكی ئاریشێن نوكه عیراق ڤه‌گرتی میراتێ كابینێن بۆریه و چه‌ندین سالان عیراق كه‌فتیه ناڤا گه‌نده‌لیه‌كا مه‌زن و وه‌لاتی بێ خزمه‌تگوزاری ماینه، به‌لێ هه‌موو ئه‌و ئاریشه بۆ كابینا عادل عه‌بدولمه‌هدی ماینه، پێدڤیه بۆ چاره‌سه‌ركرنا ره‌وشا عیراقێ رێكارێن دی بگرنه به‌ر نه‌ك هه‌لبژارتنێن به‌روه‌خت، هه‌كه هه‌لبژارتنێن به‌روه‌خت ژی بهێنه‌كرن، بێگومان دێ هه‌ر ئه‌و كۆتله‌یێن سیاسی سه‌ركه‌ڤن و تنێ دێ هنده‌ك سه‌رۆچاڤ هێنه گوهۆڕین، ب دیتنا من ئاریشه د سه‌رۆچاڤاندا نینه، به‌لكو سیسته‌مێ برێڤه‌برنا عیراقێ یێ سه‌قه‌ته و پێدڤی ب چاره‌سه‌ركرنێ و گوهۆڕینێ هه‌یه.
