كەنەدا دێ هاریكاریێن خوە بۆ كوردستانێ راوەستینیت
ئەڤرۆ نیوز ، زنار تۆڤی :
هێزێن تایبەت یێن كەنەدا کو ل هەرێما كوردستانێ هاریكاری و مەشق ب هێزێن پێشمەرگێ كوردستانێ دكرن ، ب فەرمانەکا وەزارەتا بەرگریا وەلاتێ خوە هاریكاری بۆ هێزێن پێشمەرگێ كوردستانێ راوەستاندن.
د راگەهاندنەکا وەزارەتا بەرگریا كەنەدا دا هاتیە ، کو گرووپێ ئۆپەراسیۆنێن تایبەت ماوەکێ زۆر هاریكاریان پێشكێشی هێزێن تەناهیێ یێن كوردان ل عێراقێ دكەن، ژ پێخەمەت راوەستاندنا پێشرەویا داعش و كریارێن وان یێن تیرۆریستی ، دێ دووماهیێ ب كارێن خوە ئینن.
ئاماژە ب هندێ دایە ، کو ئەو هاوكاریێن كەنەدا بۆ هێزێن تەناهیێ ل عێراقێ ب تەمامی سەركەفتن ب دەستڤە ئینایه ، د رزگاركرنا مووسلێ و حەویجە كو دوو بنگەهێن سەرەكی و مەزن یێن تیرۆرستێن داعش بوون ل عێراقێ.
هەروەسا گوتیە ، یەکەیێن تایبەت یێن هێزێن تایبەت یێن كەنەدا كو نوکە راوێژ و هاریكاریا پێشكێشی هێزێن عێراقی دكەن، دێ كارێن خوە ب دووماهی ئینن.
جەنەرال جۆن ڤانس ژ هێزێن كەنەدا بۆ رۆژناما گلۆپ ئەند مەیلی راگەهاندیە ، کو مەشقا پێشمەرگەی ب دووماهی هاتیە و هیچ هۆكارەک نینە ، کو ماوێ كارێ هێزێن كەنەدا ل عێراقێ بهێتە درێژ کرن.
هژمارا هێزێن كەنەدا ل هەرێما كوردستانێ و عێراقێ 210 سەربازێن هێزێن تایبەت بوون ، كو ئەركێ وان پێشكێشكرنا راوێژیێ و مەشقێ بوو ب هێزێن پێشمەرگەی ، سەرەرای هندێ هاریكاریێن كەنەدا بۆ پێشمەرگەی ، کو كاروانەکێ چەكان ژی بوو ، لێ ب ئەگەرێ رێگریا بەغدا ئەو چەک نەگەهشتە پێشمەرگێ کوردستانێ ، لەوما حوکمەتا كەنەدا نەچار بوو وان چەکان بدەتە هێزێن ئۆكرانی.