لقێ 14 یێ پارتی دێ ڤه‌گه‌ريته مووسل
ئه‌ڤرۆ نيوز:
بەرپرسێ لقێ 14 یێ پارتی دیموکراتی کوردستان ل مووسلێ دیار کر کو بەرنامێ پارتی دیموکراتی کوردستان یێ ھاتیە دەستنیشان کرن، د قووناغا ئێکێ دا وەکو جاران و دوبارە بارەگایێ لقێ 14 یێ پارتی بزڤڕیتە د ناڤ سەنتەرێ باژێڕێ مووسلێ دا، د قووناغا دویێ دا لژنە و رێکخراوێن ب سەر لقێ ڤە دێ ڤەگەڕنە سنوورێ ماددێ 140 یێ سەر ب سەنتەرێ قەزا مووسلێ ڤە.
عسمەت رەجەب، بەرپرسێ لقێ 14 یێ پارتی دیموکراتی کوردستان ل مووسلێ بو رۆژناما ئەڤرۆ خویا کر، ھەر وەکو بەری نوکە پارتی دیموکراتی کوردستان ب شێوەکێ قانوونی دێ چالاکی و سمینارێن خوە ل سنوورێ قەزا مووسلێ ئەنجام دەت و گۆت: “ئەم خەلکێ وان دەڤەران پشتراست دکەین دێ ل ڤان نێزیکان بارەگایێن مە ڤەگەڕنە وان جھان”.
ناڤھاتی ئاشکرا ژی کر کو د ڤان ھەردو قووناغان دا رادیۆیا مووسلێ یا سەر ب لقێ 14 یێ پارتیڤە ڤەناگەڕیت ھەتا رەوشا وان دەڤەران ب تمامی دھێتە گوھۆڕین و بۆ قووناغا سێیێ پشتی ل وان دەڤەران چالاکیێن مە بەرفرە دبن ژ نوو رادیۆ دێ ڤەگەڕیت و گۆت: “ئەم ل سەر داخوازیا خەلکێ وان دەڤەران دێ بارەگایێن خوە ل وان دەڤەران ڤەکەین، خەلکێ وان دەڤەران بۆ چەندین جاران داخواز ژ سەرکردایەتیا پارتی دیموکراتی کوردستان کریە، سەرکردایەتیێ ژی بڕیارا خوە دایە کو دوبارە بزڤڕینە وان دەڤەران، د ھەلبژارتنێن بۆری دا خەلکێ وان دەڤەران بەھرا پتر دەنگێ خوە دا لیستا پارتی دیموکراتی کوردستان، ئەڤە ژی ئێک ژ وان بەلگا یە کو خەلکێ وان دەڤەران پارتی دیموکراتی کوردستان ب خودانێ خوە دزانن”.
