له‌شكرێ عيراقێ ل ڤان هه‌ردو ميحوه‌ران يێ د پێشڤه‌چوونێ دا
ئه‌ڤرۆ نيوز:
سۆپايێ عيراقێ ل ميحوه‌رێ گه‌ياره ده‌ست ب هێرشكرنێ كريه و گۆنده‌ك يێ كۆنترۆلكرى و نوكه ژى به‌ر ب ناحيا حه‌مام عه‌ليل د پێشڤه‌چوونێ دايه.
رۆژا دوشه‌مبى 17ى چريا ئێكێ 2016 مل ب ملێ پێشمه‌رگه‌ى هێزێن سۆپايێ عيراقێ ژى ده‌ست ب ئۆپه‌راسيۆنێ كر و سێ گۆند كونترۆلكرن وئه‌ڤرۆ سێشه‌مبى ژى د به‌رده‌وامن.
سپێده‌هيا ئه‌ڤرۆ سۆپايێ عيراقێ ده‌ست ب هێرشكرنێ كريه و شياينه گۆندێ زاويه كونترۆل بكه‌ن و نوكه ژى به‌ر ب ناحيا حه‌مام عه‌ليل د پێشڤه‌چوونێ دايه كو جهه‌كێ گه‌له‌ك گرنگه.
هه‌ر ئه‌ڤرۆ سۆپايێ عيراقێ ل باژێركێ نه‌مرۆد ده‌ست ب هێرشێ كريه و دڤێت گۆندێ عه‌باس ره‌جه‌ب كۆنترۆل بكه‌ت و پاشان بگه‌هيته ده‌ڤه‌را سه‌لامه كو ده‌رگه‌هێ باژێر مووسله.
نوكه ل گۆندێ عه‌باس ره‌جه‌ب شه‌رێ كولان ب كولان يێ د ناڤبه‌را سۆپايێ عيراقێ و چه‌كدارێن داعش دا دهێته كرن و هێزێن هه‌ڤپه‌يمانان ژى يێ ژ لايێ ئه‌سمانى ڤه هاريكاريا له‌شكرێ عيراقێ دكه‌ن.
دوهى 17ى چريا ئێكێ 2016 حه‌يده‌ر عه‌بادى سه‌رۆك وه‌زيرێن عيراقێ و فه‌رماندێ هێزێن چه‌كدار ل عيراقێ ده‌مژمێرا سفر راگه‌هاند و داخواز ژ وه‌لاتيێن مووسل كر كو د هاريكار بن دا كو ب زووترين ده‌م ده‌ڤه‌رێن وان ژى ژ بن ده‌ستێ داعش بهێنه ده‌ر.
هه‌ر پشتى راگه‌هاندنا ده‌مژمێر سفر، هێزێن پێشمه‌رگێ كوردستانێ ب پشته‌ڤانيا هه‌ڤپه‌يمانيا نێده‌وله‌تى ژ لايێ ئه‌سمانى ڤه، شيان هه‌ر ئێك ژ گۆندێن كێبيرلى، شێخ ئه‌مير، شاقۆلى، بازگرتان، تارجه‌له، باسخره، به‌دانا بچووك و به‌دانا مه‌زن كۆنترۆل بكه‌ن هه‌ر وه‌كو شانا له‌شكرى يا پێشمه‌رگه‌ى راگه‌هاندى.
په‌يامنێرێ ئه‌ڤرۆ نيوز ل سنورێ ميحوره‌ێ خازر، ئۆمێد وه‌لاتى راگه‌هاند كو پشتى ئه‌ڤ گونده هاتينه رزگاركرن ئه‌ڤرۆ پێشمه‌رگه چو لڤينان ناكه‌ت و بڕياره ئه‌و گۆندێن هاتينه ئازادكرن ژ مينان بهێنه پاقژ كرن.