له‌شكه‌ره‌كێ بريندارێ تورك: ھەتا نھا مە نەشیایە گوندەکێ ژی کۆنترۆل بکەین
ئه‌ڤرۆ نيوز:
ئەفسەرەکێ بریندار یێ ئۆپەراسیۆنا عەفرینێ راگەھاند کو ھەتا نھا ژی ئەو ب چەکێن گران عەفرینێ بۆمبەباران دکەن و راگەھاند کو سەرەرای ھەبوونا فرۆکە و چەکێن گران ھێزێن وان نەشیاینە ھەتا نھا گوندەکێ ژی کۆنترۆل بکەن و شەرڤانێن کورد ب دژواری بەرخوەدانیێ دکەن.
ئالپەر ئاکپونار ئەفسەرێ ھێزێن ئەردی یێن لەشکرێ تورکیا پشتی کو د ئۆپەراسیۆنا عەفرینێ دا بریندار بوویی و نھا ل مالا خوە دایە بۆ دەزگەھێن راگەھاندنێ ئاخڤی و دیار کر کو دو رۆژان بەری ئەم دەست ب ئۆپەراسیۆنێ بکەین فرۆکە و چەکێن گران ب دژواری عەفرین و دەوروبەرێن وێ تۆپباران کرن و پشتی سێ رۆژان ئەم ب چەکێن گران وەکو تانکان مە بەرێ خوە دا عەفرینێ و گۆت: (تنێ مە شیا ٣٠٠ میتران پێشڤە بچین، پاشی ھێزێن یەپەگێ ھێرشی مە کرن و دو رۆژان وان ب ھەموو چەکێن د دەستێ خوە دا ھێرشی مە کرن و چەندین کەس ژ مە شەھید بوون و ھندەک ژی بریندار بوون و ئەز ئێک ژ وان کەسامە کو بریندار بووم).
ئەفسەرێ تورک ھەروەسا ئەو یەک ژی دیار کر کو فرۆکە و چەکێن گران رۆلەکێ باش د ئۆپەراسیۆنا عەفرینێ دا دبینن، لێ ژ بەر کو ھێزێن یەپەگێ ب دژواری بەرخوەدانێێ دکەن ھەتا نھا ھێزێن مە نەشیاینە ب رێیا ئەردی گوندەکێ ژی کۆنترۆل بکەن و شەر ب دژواری بەردەوام دکەت، لێ فەرماندارێن مە دبێژن دێ ئۆپەراسیۆن یا بەردەوام بیت و ئەز ھێڤیدارم ھەڤالێن من ب سلامەت بن و گۆت: (نھا ئەز بریندارم لێ برینا من سڤکە و پشتی چەند رۆژان ئەز دێ باش بم، پشتی کو ساخلەمیا من وەکو بەرێ لێ ھات ئەز دێ جارەکا دی ڤەگەرمە ڤە سەر ئەرکێ خوە و دێ پشکداریێ د ئۆپەراسیۆنا عەفرینێ دا کەم).
ل ئالیێ دی دەزگەھێن راگەھاندنا تورکیا راستیێن ئۆپەراسیۆنا عەفرینێ بۆ رایا گشتی ئاشکرا ناکەن و بەری نھا چەندین دەزگەھێن راگەھاندنا تورکیا ب تایبەتی ژی یێن سەر ب پارتیا دەستھەلاتدار وەسا دیار کربوون کو شیاینە چەند ھزار شەرڤانێن یەپەگێ بکوژن، لێ نھا ژ ئاخڤتنێن ئەفسەرێ بریندار یێن ئۆپەراسیۆنا عەفرینێ راستیا بابەتی ئاشکرا دبیت.
ل ئالیێ دی شاندەکێ تەڤدەمێ ب سەرۆکاتیا ئالدار خەلیل ھەڤسەرۆکێ تەڤدەمێ سەرەدانا فرەنسا کرن و ل گەل سەرۆکێ بەرێ یێ فرەنسا فرانسوا ھۆلاند کۆمبوون و داخواز ژ فرەنسا کرن کو پشتەڤانیێ ل ھێزێن سووریا دیموکراتیک بکەت و رێ نەدەت کو تورکیا باژێرێ عەفرینێ و باژێرێن دی یێن رۆژئاڤایێ کوردستانێ داگیر بکەت، ژ ئالیێ خوە ڤە ھۆلاند ژی راگەھاند کو ئەو بەردەوام پشتەڤانیێ ل مافێ رەوا یێ گەلێ کورد ل سووریێ و عیراقێ دکەن و دیار کر دێ داخواز ژ سەرۆکێ فرەنسا ماکرۆنی کەت کو رۆلەکێ گرنگ بۆ پشتەڤانیا ھێزێن سووریا دیموکراتیک بگێریت و رێ نەدەت تورکیا رۆژئاڤایێ کوردستانێ ب تایبەتی ژی باژێرێ عەفرینێ داگیر بکەت.
