ليستا ناڤێن 402 هزار مووچه‌خۆرێن كوردستانێ بۆ به‌غدا دێ هێته هنارتن
ئه‌ڤرۆنيوز:
به‌رپرسه‌كێ حوكمه‌تا هه‌رێما كوردستانێ راگه‌هاند، ليستا مووچێ 402 هزار مووچه‌خۆرێن هه‌رێمێ دێ بۆ به‌غدا هيته هنارتن.
هيوا ئه‌فه‌ندى، سه‌رۆكێ فه‌رمانگه‌ها ته‌كنولۆژيا وپێزانينان ل جڤاتا وه‌زيرين هه‌رێما كوردستانێ گۆت” دڤان چه‌ند رۆژان دا دێ ليسته‌كا مووچه‌خۆرێن هه‌رێمێ هێته هنارتن بۆ به‌غدا ول سه‌ر داخوازا لژنا هووربينيا مووچه‌ى كو ژلايێ حوكمه‌تا عيراقێ ڤه هاتبوو پێكئينان، ئه‌و ليسته ژى ناڤێن 402 هزار مووچه‌خۆران ب خوه‌ڤه دگريت”.
هيواى زێده‌تر بۆ باسنيوز گۆت”ئه‌و ليستا دێ بۆ به‌غدا هنێرين، ناڤێ هژماره‌كا وه‌زاره‌ت وفه‌رمانگه‌هان تێدا نينه، ديسا ناڤێ وان مووچه‌خۆرێن كو ب سه‌ر به‌غدا ڤه‌نه تێدا نينه، ل گه‌ل ناڤێ وه‌زاره‌تێن پێشمه‌رگه وناڤخوه وداموده‌زگه‌هێن ئه‌منى”.
دياركر ژى” ئه‌و لژنێن به‌غدا شيانێن هووربينيا ليستێن مووچێ كوردستانێ نينه، له‌وما په‌نا بۆ تۆمارا بايۆمه‌ترى ئينا ووان شيانێن هووربينيا زێده‌تر ژ مليۆن مووچه‌خۆرێن مه نينه، له‌وما مه وه‌زاره‌ت ب وه‌زاره‌ت ليست بۆ وان به‌رهه‌ڤكرن ودێ بۆ هنێرين”.
