لژنا ئازادکرنا مووسلێ ھاتە پێکئینان
ئەڤرۆ نیوز:
فەرماندەکێ پێشمەرکێ کوردستانێ ئاشکرا دکەت کو گەلەک محیوەرێن پێشمەرگەی ھەتا دەە کیلومەتران نێزیکی سەنتەرێ مووسل بووینە، نەخشێ پێشمەرگەی نوکە ھاتینە گوھۆڕین و ھەر ھێرشەکا بۆ سەر مووسل دەستپێ بکەت پێشمەرگە دئامادە باشیێ دایە.
عەمید بەھرەم عەریف یاسین فەرماندێ پێشمەرگێ کوردستانێ ل چیایێ باشیکێ بۆ رۆژناما ئەڤرۆ گۆت: خوە راگریا خەلکێ کوردستانێ و فیداکریا پێشمەرگێ کوردستانێ و پشتەڤانیان ھەڤپەیمانێن کوردستانێ، نوکە شێوازێ شەری ھاتیە گوھۆڕین شێوازێ بەرەڤانیکرن بۆ شێوازێ ھێرش برنێ یە، ھێرشێن پێشمەرگێ کوردستانێ بۆ سەر داعش و ئازادکرنا گوندێن برایێن کاکەی سەد ژ سەدێ ئەوان ھێرشا سەرکەفتن ئینان، ئەڤە پرۆسە ل بن نەخشە و چاڤدێریا سەرۆک مەسعود بارزانی ھاتە دەسپێکرن و ب سەرکەفتیانە ب دووماھی ھات، تیرۆرستێن داعش زیانێن مەزن ڤێ کەفتن، بۆ دیار بوو کو جھێ وان ل کوردستانێ نینە، ئیرادا خەلک و پێشمەرگێ کوردستانێ گەلەک یا بھێزە.
ھەمان فەرماندێ پێشمەرگێ کوردستانێ ئەو چەندە ژی نە ڤەشارت و گۆت: نوکە لژنەک ھاتیە پێکئینان و ڤەکۆلینا ل سەر چاوانیا ئازادکرنا مووسل دھێتەکرن، ئەو ھێزێن دێ پشکداربن و رێکخستنێ ل گەل ھوزێن عەرەبێن سونە و کارگێریا پارێزگەھێ و دیسا رێکخەریێ ل گەل وەلاتێن ھەڤپەیمان کارکرن، ل سەر چاوانیا برێڤەبرنا کارگێریا مووسل پشتی ئازادکرنێ و نوکە کارێ ل سەر ڤێ چەندێ دھێتەکرن، و ئەڤە پشتی رێککەفتن ل سەر دھێتەکرن، مووسل ئێک ژ ئەوان ئارمانجانە کو ل دەمێن نێزیک بھیتە رزگارکرن و پێشمەرگێ کوردستانێ دوور ژ بۆچوونێن ئاینی وەک ئەرکەکێ سەرەکی ھەموویان دپارێزیت، دیسا حوکمەتا ھەرێما کوردستانێ ژی ھەموو خزمەت گوزاریێن ژیانێ دگەھینتە ئەڤان دەڤەران.
ھەمان فەرماندێ پێشمەرگێ کوردستانێ گۆت: ھێرشا پێشمەرگەی یا ب سەر داعش رۆژێن بۆری ھاتیە دەسپێکرن ل محوەرێ خازر بوویە ل گوندێ وەردەک ب دو قوناغان و شیان سەرکەفتنێن ھەرە باش ب زووترین دەم ب دەست ڤە بینن، دەڤەرەکا زۆر ھاتە رزگارکرن نوکە ل بن کونترۆلا پێشمەرگەی دایە، و ھەموو جھان نوکە رەوش ل بن کونترۆلا پێشمەرگێ کوردستانێ یە، ھەروەسا عەمید بەھرەم خوەیاکر، ئەڤ دەڤەرا ھاتیە ئازاکرن نێزیکی پازدە کیلۆۆمەتران نێزیکی سەنتەرێ مووسل بوویە، ب شێوەکێ گشتی محوەرێن پێشمەرگێ کوردستانێ ل (تلسقوف، خازر، نەوەران، باشیک ) ھەموو دەڤەران نێزیکی دەە ھەتا پازدە کیلۆمەتران نێزیکی سەنتەرێ مووسل بووینە، ھەکە سەرۆکێ ھەرێما کوردستانێ فەرماندێ گشتیێ ھێزێن چەکداری فەرمانێ بدەت، پێشمەرگە پشکداری ئازادکرنا مووسل ببیت، پێشمەرگە یێ بەرھەڤە ھەر ژ شنگال ھەتا دگەھیتە مەمخور و ب ئاوایەکێ ب ساناھی ئەوان دەڤەران ئازاد بکەن، لێ دڤێت پتر کەل و پەلێن لەشکەری بۆ پێشمەرگەی بھێنە دابینکرن، بباوەریا مە کا چەوا تیرۆرستێن داعش ل ھەموو محوەران ل سەر دەستێ پێشمەرگەی دھێنە شکاندن، ب ھەمان رەنگی دێ ل سەر دەستێن پێشمەرگێ کوردستانێ ل مووسل ژی ھێنە شکاندن.
فەرماندێ پێشمەرگەی ل چیایێ باشیکێ ئەو چەندە ژی نە ڤەشارت و گۆت: ورەیا داعش گەلەک ھاتیە تێکشکاندن، ژیانا خەلکی ل ئەوان دەڤەرێن بن کونترۆلا داعشێ دا کەلەگ یا ب زحمەت کەفتیی، خەلکێ تشتێن خوە دفرۆشن و ژیان نەمایە و پتریا ئاکنجیێن ئەوان دەڤەرا چاڤەرێی ئازادکرنا مووسلن، ب باوەریا من ئەڤ خەلکێ ئەڤان دەڤەران ب گشتی دێ ھاریکاریا ھێزێن پێشمەرگێ کوردستانێ کەن، ھەکە ھات و پشکداری دئازاکرنا مووسل دا ب کرن، دێ پتر ئاسنتر بیت پرۆسێسا ئازادکرنا ڤی باژێری و دێ تیرۆرستێن داعش ب زووترین دەم تووشی شکاندنێن مەزن بن.
