لژنا هەڤپشک رێکێ نادەت شەربەت و شریناهی ل سەر جادان بهێنە فروتن
ئەڤرۆ نیوز، عەلی حاجی:
ئەندامەکێ لژنا هەڤپشک ل زاخۆ بۆ ئەڤرۆ نیوز دیار کر، لژنا وان بەردەوام چاڤدێریا بازارێ زاخۆ دکەت و ب چو رەنگان رێکێ نادەن ل سەر جادان شەربەت و شریناهی د مەها رەمەزانا دا بهێنە فروتن.
زێدەتر د. لاوین هابیل گۆت: لژنا هەڤپشک ل زاخۆ روژانە چاڤدێریا نانپێژ و جهێ فروتنا چەرەزات و مارکێتان و شریناهیان دکەن، د ماوێ دو رۆژان دا وان شیایە سەرەدانا ٤٥ جهان بکەن و ژ وان ژی پێنچ جهـ ژ مارکێت و جهێن چەرەزاتان سزادان ب کوژمەیەکێ پارەی و هەر دیسان هوشداری دایە شەش جهان و دەست ب سەر ١٢١ کیلویێن کەرەستێن ئێکسپایەر دا گرتن و زێدەباری وێ چەندێ ژی هەمی جهـ هاتینە ئاگەهدار کرن ب تایبەت مارکێت و نانپێژ و جهێن شریناهیان کو پێدڤی یە کەمامە و دەستکێشان جهێ کاری دا ب کار بینن و لدووڤ رێکارێن وەزارەتا ساخلەمیێ کار بکەن بو پاراستنا سلامەتیا وان و ئەم دێ بەرەوام ژی بین ل سەر چاڤدێریا بازاری ب تایبەتی ژی د مەها رەمەزانا پیرۆز دا.