لیستەکێ خوە ژ پڕۆسا ھەلبژارتنان ڤەکێشا
ئەڤرۆ نیۆز، قائید میرۆ:
ئێکەم لیست خوە ژ پڕۆسا ھەلبژارتنێن پەرلەمانێ کوردستانێ ڤەکێشا و سەرۆکێ لیستێ ژی ئەگەرێ خوە ڤەکێشانێ بۆ راستڤەنەکرنا قانوونا کۆرسیێن کۆتا ڤەگەڕاند.
دکتۆر سرۆد سەلیم، سەرۆکێ لیستا ئەبناء ئەلنەھرێن یا کریستیانان بۆ ئەڤرۆ نیۆز دیارکر” لیستا وان خوە ژ پڕۆسا ھەلبژارتنێن پەرلەمانێ کوردستانێ ڤەکێشا و دبێژیت” ئەگەرێ خوە ڤەکێشانا لیستا مە بۆڤێ چەندێ ڤەدگەڕیت قانوونا ھەلبژارتنان نەھاتیە راستڤەکرن و بڤێ چەندێ زیان گەھاندینە کۆرسیێن کۆتا یێن تایبەت ب پێکھاتەیان.
سەرۆکی لیستا ئەبنا ئەلنەھرێن ئاماژەکر” مە دخواست شێوازێ ھەلبژارتنێن کۆرسیێن کۆتا بھێتە گۆھۆڕین و دەستوەردان نەمینیت ژلایێ ھندەک لایەنێن سیاسی بۆ چێکرنا لیستان، ھەتا ھەڤڕکی لسەر کۆرسیێن کۆتا نەھێتەکرن ژ دەرڤەی پێکھاتەیان.
دکتۆر سرۆد سەلیم دبێژیت” مە ب پێدڤی زانی ئەم خوە ڤەکێشین و بڤی شێوازێ نوکە دێ زیان ھەبن بۆ ھەلبژارتنێن کۆرسیێن کۆتا، بەلکو پێدڤیە تنێ ھەر پێکھاتەیێن دناڤا خوەدا ھەڤڕکیێ بکەت لسەر بدەستڤە ئینانا کۆرسیان.
