لەشکرێ عیراقێ پێگریێ ب رێککەفتنا ڤەکرنا رێیا مووسل بۆ شێخان ناکەت
ئه‌ڤرۆ نيوز:
فەرماندێ سوپایێ سێ یێ زێرەڤانی ل میحوەرێ ناوەران دیار کر کو ل 12-5-2018 بڕیار ھاتە دان رێیا د ناڤبەرا مووسل و قەزا شێخان دا کو ب رێیا ناوەران یا ناڤدارە بھێتە کرن، ژ لایێ خوەڤە پێشمەرگەی رێ ڤەکر و دبێژیت: ب تنێ بۆ دەمێ رۆژەکێ ئەڤ رێیە ھاتە ڤەکرن و جارەکا دی ژ لایێ حەشدا شەعبی و لەشکرێ عیراقێ ڤە ھاتە گرتن ڤە.
عەمید فەھمی سندی، فەرماندێ سوپایێ سێ یێ پێشمەرگێن زێرەڤانی ل میحوەرێ ناوەران بۆ رۆژناما ئەڤرۆ ئاشکرا کر کو د نوکە دا ژ لایێ لەشکرێ عیراقێ و حەشدا شەعبی ڤە رێیا ناوەران ب دنگێن چیمەنتوی ھاتیە گرتن و گۆت: “مەرەما وان ژ ڤێ چەندێ ئەوە کو بزاڤێن پێشمەرگەی سەرنەگرن و ئاریشە و ئاستەنگان بۆ وەلاتیان دروست بکەن، ژ بەرکو ژ لایێ مەڤە؛ پێشمەرگەی رێک ڤەکریە و ھەر دەمەکێ بھێن و سەرەدانا مە بکەن؛ ئەم د بەرھەڤین و خودانێن وێ چەندێینە کو ھەموو دەمان رێک یا ڤەکری بیت بۆ بەڕژەوەندیا رێڤینگان”.
ناڤھاتی گۆتژی: “د نوکە دا خەلک رۆژانە ھاتنوچوونێ ب پێیان ل مووسلێ دەربازی ناوەران دبن و ژ وێرێ ب ترۆمبێلان دچنە قەزا شێخان، چەندین جاران مە بزاڤ کرینە و بڕیارا ڤەکرنا وێ رێکێ دایە، لێ حەشدا شەعبی و لەشکرێ عیراقێ پێگری ب رێککەفتنا ڤەکرنا وێ رێکێ نەکر و رۆژەکێ پشتی ڤەکرنێ گرتە ڤە”.
عەمید فەھمی خویا ژی کر کو پێشمەرگە د نوکە دا چاڤەڕێی وێ چەندێ یە و ھیڤیدارە ھەڤپەیمانیەکا نوو د ناڤبەرا ھێزێن سەرکەفتی د ھەلبژارتنان دا ژ کورد و عەرەبان بھێتە ئاڤاکرن بۆ پێکئینانا حوکمەتەکا ھەڤگرتی و ئاڤاکەر ل سەر بناغێ تەوافقێ و بشێت خزمەتا خەلکێ عیراقێ ب گشتی بھێتە کرن و ئاریشێن د ناڤبەرا ھەردو لایان دا بھێنە چارەسەرکرن و پێدڤیێن خەلکێ ھەرێمێ بھێنە دابینکرن.
