ل ئاکرێ ئاگری ب کۆژمێ ملیار دیناران زیان گەھاندیە وەلاتیان
ئەڤرۆ نیوز:
بەرپرسێ راگەھاندنا بەرەڤانیا باژێری ل ئاکرێ بۆ رۆژناما ئەڤرۆ ئاشکرا کر کو ھەر ژ دەستپێکا وەرزێ ھاڤینێ و وەرزێ درینا گەنمی ل سنوورێ قەزایێن بەردەرەش و ئاکرێ و ناحیێن کەلەکچی و قەسروکێ حەفت کەس د دەمێ مەلەڤانیکرنێ دا خەندقینە و 398 روودانێن ئاگربەربوونێ پەیدابووینە و گۆت: “ڤان روودانان دا زێدەتری ملیار دیناران زیان گەھاندیە وەلاتیان”.
رائید فیراس یاسین، بەرپرسێ راگەھاندنا بەرەڤانیا باژێری ل ئاکرێ دیار کر کو د وەرزێ ھاڤینا ئەڤ سالە دا 26 دکانێن وەلاتیان سۆتینە و ب کۆژمێ 700 ملیۆن دیناران زیان گەھشتیە خودانێن وان دکانان و سەرەرایی ڤێ چەندێ چار مال و چار ترۆمبێل ژی سۆتینە زێدەتری 10 ملیۆن دیناران زیان گەھشتیە خودانێن وان و گۆت: “سەرجەمێ وان ھەموو روودانێن د وەرزێ ھاڤینا ئەڤ سالە دا پەیدابووین ملیارەک و 10 ملیۆن دینارن”.