ل ئيرانێ خوه‌نيشادان بۆ ده‌ركرنا وه‌لاتيێن عيراقى دهێنه كرن
ئه‌ڤرۆنيوز:
ل باژێرێ عه‌بادان يێ سه‌ر ب پارێزگه‌ها خۆزستان ل باشوورێ ئيرانێ خوه‌نيشادان هاته كرن دژى سه‌ره‌دانا وێ هژمارا مه‌زن يا گه‌شتيارێن عيراقى بۆ باژێرێ وان.
ل مالپه‌رێن ده‌نگوباسێن ئيرانى ئه‌ڤرۆ ئه‌ينيێ پارچه ڤيديۆيه‌ك هاته به‌لاڤكرن كو تێدا ب سه‌دان خوه‌نيشانده‌ر ل باژێرێ عه‌بادان ب درووشمێ ( وه‌لاتيێن عيراقى بۆ ده‌رڤه) ب زمانێ فارسى خوه‌نيشادان كر دژى وان گه‌شتيارێن پارێزگه‌هێن باشوورێ عيراقێ بۆ پارێزگه‌ها خۆزستان يێن بێ ڤيز هاتينه ئيرانێ ل دووڤ رێككه‌فتنه‌كا به‌غدا وته‌هران.
هه‌روه‌سا كه‌نالێ خۆزستان يێ ته‌له‌ڤزيۆنى ب رێيا ته‌له‌گرامێ راگه‌هاند” خوه‌نيشادانا هاتيه كرن بۆ نه‌رازيبوونێ ل به‌رامبه‌ر وێ هژمارا مه‌زن يا گه‌شتيارێن پارێزگه‌هێن باشوورێ عيراقێ ئه‌وێن دهێن بۆ كرينا كه‌لوپه‌لێن ئيرانى پشتى هاتنا خوار يا دراڤێ ئيرانى.
ئه‌ندامێ ده‌ڤه‌را ئابوورى يا ئازاد ل باژێرێ عه‌بادان، ئيسماعيل زه‌مانى، دبێژيت” ڤيزا هاتنا ئيرانى بۆ گه‌شتيارين بيانى يا هاتيه لادان، رێكخراوا ده‌ڤه‌را ئازاد ژى گرنگى نه‌دايه داخوازيێن خوه‌نيشانده‌ران”.
زه‌مانى گۆت ژى” خوه‌نيشادانێن باژێرێ عه‌بادان پشتى وێ چه‌ندێ دهێت كو بهايێ دراڤێ ئيرانى يێ لاواز بووى به‌رامبه‌ر دراڤێ عيراقى، ڤێ چه‌ندێ ژى وه‌كريه وه‌لاتيێن عيراقى ب تايبه‌ت وه‌لاتيێن باژێرێ به‌سرا بهێنه باژێرێ عه‌بادان بۆ كرينا پێدڤى وكه‌لوپه‌لان”.
