ل به‌رده‌ره‌ش جوتياره‌ك مه‌زنترین پرۆژێ چاندنا شتى ل كوردستانێ ددانيت
ئه‌ڤرۆ نیوز ، نه‌وزاد هلۆرى:
جوتیاره‌كێ پارێزگه‌ها دهۆكێ مه‌زنترین پرۆژێ چاندنا شتیا ل سنورێ قه‌زا به‌رده‌ره‌ش چاندیه كو تێرا هه‌موو كوردستانێ دكه‌ت بۆ به‌رهه‌مئینان و دابینكرنا شتیان، خودانێ پرۆژه‌ى دیاركر كو رۆژانه دناڤبه‌را 200 بو 250 كرێكاران تێدا كاردكه‌ن.
عه‌لى عومه‌ر خودانێ پرۆژێ چاندنا شتیا ل به‌رده‌ره‌ش بۆ ئه‌ڤرۆ نیوز گۆت” ب مه‌ره‌ما دابینكرنا شتیێ خومالى ، مه مه‌زنترین پرۆژێ شتیا ل كوردستانێ ل به‌رده‌ره‌ش چاندیه و نها كه‌فتیه دبه‌رهه‌مى دا و تێرا هه‌موو كوردستانێ هه‌یه بۆ دابینكرنا شتى”.
زێده‌تر گۆت”ئه‌ڤ پرۆژه ل سه‌ر رووبه‌رێ 600 دونه‌مان هاتیه چێكرن و رۆژانه 200 بۆ 250 كرێكاران تێدا كاردكه‌ن و ل سه‌ر سیسته‌م و ستانداره‌كێ سه‌رده‌م و جیهانى ب ئه‌ندازیاریه‌كا پێشكه‌فتى هاتیه چێكرن و رۆژانه چه‌ندین ئه‌ندازیارێن تایبه‌تمه‌ند و بسپور تێدا كاردكه‌ن و شیانێن به‌رهه‌مئینانا زێده‌تر ژ 10 هزار ته‌نێن شتیان هه‌یه”.
دیاركر ژى” هه‌كه شتیێ هاورده نه‌هێته كوردستانێ، یان ژى باج ل سه‌ر بهێته دانان، ئه‌و دشێن بۆ هه‌موو كوردستانێ ب بهایه‌كێ گونجاى شتى دابین بكه‌ن و گۆت” نها شتیێ پرۆژێ مه كه‌فتیه دوارێ به‌رهه‌مى دا و بۆ هه‌ولێر و سلێمانى و دهۆك و ده‌ڤه‌رێن كوردستانی يێن ده‌رڤه‌یێ ئيدارا هه‌رێما كوردستانێ و بازارێن ناڤخوه دهێته ڤرێكرن و بهایێ فروتنا وان ژ هه‌موو ده‌ڤه‌ران ئه‌رزانتره و كیلو دناڤبه‌را 200 بو 400 دینارانه و ب گۆره‌ى بهایێ رۆژێ دهێته فروتن”.
