ل جادەکا دھۆکێ دو سالە ئاڤ ل بن ئەردی دزێت
ئەڤرۆ نیوز:
ل جادەکا دھۆکێ ل تاخێ نوھەدرا دو سالە ئاڤ ژ بن ئەردی دزێت و ھەتا نھا نەھاتیە چارەسەرکرن. ئاکنجیێن وێ جادێ گلەیێ ژ رێڤەبەریا ئاڤا دھۆکێ دکەن کو دەست ب چێکرنا پرۆژەی کریە و وەسا ھێلایە و چارەسەرناکەت. رێڤەبەریا ناڤبری ژی ئاشکرا دکەت کو وان ڤەدیتن بۆ پرۆژەی چێکریە و ل نێزیک دێ وێ ئاریشێ چارەسەرکەن.
سەھەیب سەعدوللا ئێک ژ ئاکنجیێن وێ جادێ بۆ ئەڤرۆ دیار کر، ئەڤە نێزیکی دو سالانە ئاڤ ژ بن جادا ئەزالیا ل تاخێ نوھەدرا دزێت و ژیانا ئاکنجیێن وێ جادێ نەخۆش کریە و ھەردەم د بێ ئاڤن، ڤێ ژی گەلەک ئاریشە بۆ وان پەیداکرینە و گۆت ژی: ئەڤە نێزیکی ھەیڤەکێ یە رێڤەبەریا ئاڤا دھۆکێ ھاتیە جادا وان کۆلایە و دەست ب چارەسەرکرنا وێ ئاڤێ کریە، بەلێ پشتی کۆلانا جادێ رێڤەبەریا ئاڤێ یا بەرزەبووی.
ناڤبری ئاماژە دا وێ چەندێ، ل گۆرەی پێزانینان ڤەدیتن بۆ پرۆژەی ھاتیە کرن و کۆژمەکێ پارەی ژی کو نێزیکی 4 ملیون دینارانە بۆ وی پرۆژی ھاتینە تەرخانکرن، بەلێ ھەتا نوکە چو کار د پرۆژەی دا نەھاتیە کرن و گۆت ژی: بەری دو رۆژان رێڤەبەریا ئاڤا دھۆکێ سەرەدانا مە کریە و گۆتیە مە دڤێت ھوون 45 ھزار دیناران حەقێ قەفیسا ئاڤێ بدەن و 20 ھزار دیناران حەقێ کرێکاری و 70 ھزار دینار ژ خودانێ مارکێتێ وەرگرتینە ب بەھانا حەقێ قەفیسێ و حەقێ کرێکاری.
ئەندازیار نایف ئسماعیل محەمەد سالح ژ رێڤەبەریا ئاڤا دھۆکێ بۆ ئەڤرۆ دیارکر، وان ئاگەە ژ ئاریشا ئاڤێ ل وی تاخی ھەیە و نھا وان ڤەدیتن چێکریە و پێشکێشی جھێن پەیوەندیدار ژی کریە ب کۆژمێ سێ ملیۆن دیناران و گۆت: نھا مە ئشتیراک بۆ وان چێکرینە کو ئاڤ بۆ وان بچیت و ھەتا پارە دگەھیت ژ نوو دێ جادە و پرۆژە ب تمامی ھێتە چێکرن.
ناڤبری ئاشکرا ژی کر کو ب تنێ ئشتیراکێن وان یێن ئاڤێ شکەستینە و پێدڤی بوو وان ل سەر کیستێ خوە چێکربان، لێ رێڤەبەریا مە ئەڤ ئاریشا وان ب ستوویێ خوەڤە گرتیە و گۆت ژی: ئەم چو پارا ژ چو خێزانان وەرناگرین، ب تنێ مە حەقێ قەفیسێ ژ وان وەرگرتیە.
