ل دادگه‌ها دهۆك دێ سكالا قانوونى ل سه‌ر په‌رله‌مانتارا گۆڕان هێته تۆماركرن
ئه‌ڤرۆ نيوز، نيوار محه‌مه‌د سه‌ليم:
هه‌ر ئێك ژ ئامينا زكرى و دلشاد شه‌عبان په‌رله‌مانتارێن پارتى ديموكراتى كوردستان ل په‌رله‌مانێ كوردستانێ كو ئێك كچا پيشمه‌رگه‌يه و يێ دژى كورێ شه‌هيدى يه دێ سكالا قانوونى ل سه‌ر په‌له‌مانتارا گۆڕان ل جڤاتا نوونه‌رێن عيراقێ تۆمار كه‌ن.
سروه عه‌بدولواحد په‌رله‌مانتارا فراكسيۆنا گۆڕان ل جڤاتا نوونه‌رێن عيراقێ د هه‌ڤديتنه‌كا تله‌ڤزيۆنى دا گۆتبوو: “خێزانێن پێشمه‌رگێن شه‌هيد مژوولى له‌شفرۆشيێ نه ژ بێ پاره‌يێ”.
ئه‌ڤ هه‌ردو په‌رله‌مانتاره د راگه‌هاندنه‌كێ دا كو دانه‌ك ب ده‌ست ئه‌ڤرۆ نيوز كه‌فتيه دده‌نه زانين كو ئه‌ڤ داخۆيانيا سروه عه‌بدولواحد لوتكا شه‌رمزاريێ يه به‌رامبه‌ر پێشمه‌رگه‌ى، ژنان، خووشك، دايك و كه‌س و كارێن شه‌هيدان و خوونا شه‌هيدان، هه‌ر چ بێ شه‌رمى و ئاخفتنێن بێ رامان و پووچ هه‌نه دژى هه‌موو پيرۆزيان و ئێكه‌تيا ئه‌ردێ كوردستانێ كرينه.
دده‌نه زانين ژى كو ژ به‌ر ڤێ چه‌ندێ پێدڤيه سنوره‌ك بۆ وان بهێته دانان، “كچ و ژنێن كورد يێن چووينه به‌ر خلفا سێدارێ و ئاماده نه‌بووينه سه‌رێ خوه شوور بكه‌ن، دايكا شه‌هيد و پێشمه‌رگه‌ى، ژن، و كه‌س و كارێن خوه وه‌سان په‌روه‌رده نه‌كرينه په‌نايێ ببه‌نه به‌ر له‌شفرۆشيێ و هه‌كه كه‌فته ته‌نگاڤيێ ژى، هه‌موو كورد دزانيت كورێن مێرخاس و ئه‌ڤ هه‌موو برا و مام و كه‌سێن جوان و مێهره‌بان روحا خوه كريه قوربان داكو ئه‌رج و كه‌رامه‌ت و نامۆسا مه يا پاراستى بيت”.
د پشكه‌كا دى يا راگه‌هاندنا هه‌ڤپشك يا ڤان هه‌ردو په‌رله‌مانتاران دا هاتيه: “ئه‌م وه‌كو نوونه‌رێن گه‌ل، نوونه‌رێن پێشمه‌رگه‌ى و ژنا شه‌هيد و كچ و كورێن شه‌هيد به‌رامبه‌ر ڤێ سڤكاتيێ بێ ده‌نگ نابين و رۆژا دوشه‌مبى دێ سكالا قانوونى دژى ناڤبريێ تۆمار كه‌ين”.
