ل دهۆكێ 10 هزار كه‌س ژ ده‌نگدانا تايبه‌ت بێ به‌هر بوون
ئه‌ڤرۆنيوز:
به‌رپرسێ نڤيسينگه‌ها هه‌لبژارتنان ل لقێ ئێكێ پارتى، خالد ئه‌حمه‌د راگه‌هاند، ژئه‌گه‌رێ كێشێن ته‌كنيكى وژكاركه‌فتنا ئاميرێن ده‌نگدانێ، نيزێكى 10 هزار پێشمه‌رگه وپۆليس وكارمه‌ندێن ده‌زگه‌هێن ئه‌منى ژده‌نگدانێ بێ به‌هر بوون.
خالد زێده‌تر بۆ مالپه‌رێ فه‌رميێ پارتى گۆت”ل سه‌نته‌رێ باژێرێ دهۆكێ پشكدارى دده‌نگدانا تايبه‌ت دا 83% بوو”.
ژلايێ خوه‌ڤه سه‌رۆكێ جڤاتا قه‌زا شنگالێ وه‌يس نايف گۆت” ژئه‌گه‌رێ كاركرنا ئێك ئاميرێ ده‌نگدانێ ب تنێ، زێده‌تر ژ 400 كه‌سان ژ هێزێن ئه‌منى ژده‌نگدانێ بێ به‌هر بوون”.
وه‌يس گۆت ژى” پرۆسا ده‌نگدانا تايبه‌ت ل سنورێ قه‌زا شنگالێ گه‌له‌ك گێشه هه‌بوون، ژبه‌ركو تنێ دو ئاميرێن ده‌نگدانێ بۆ دانابوون وئێك ژوان تنێ كاردكر، ئه‌ڤه ژى بوو ئه‌گه‌ر كو هژماره‌كا مه‌زن ژ هێزێن ئه‌منى بێ به‌هر بن ژده‌نگدانێ”.
ناڤبرى گومان هه‌بوو كو ئه‌و كاره ب مه‌به‌ست هاتيه كرن بۆ وێ چه‌ندێ هيزێن ئه‌منى نه‌شێن ده‌نگێ خوه بده‌ن وحه‌شدا شه‌عبى ل وێرێ يا ده‌ستهه‌لاتداره.
