ل ده‌ڤه‌رێن چيايى يێن پارێزگه‌ها دهۆك گازا سپى دێ هێته به‌لاڤكرن
ئەڤرۆ نيوز، نه‌وزاد هلۆرى و ره‌مه‌زان هه‌رنى:
سەرەرایی کو بھایێ گازا بازرگانی بەرامبەر ھەیڤا بوری ھاتیە خوارێ، بەلێ ھێشتا وەلاتی چاڤەرێ گازا مالان ژ حوکمەتێ دکەن و دەست ب کرینا گازا بازرگانی نەکریە، ئەندامەکێ لژنا سۆتەمەنیێ ژی ل جڤاتا پارێزگەھا دھۆکێ دیارکر کو رەنگە ل حەفتیا بھێت ل دەڤەرێن چیایی دەست ب بەلاڤکرنا گازێ بھێتە کرن.
ئومێد ئەمین خودانێ پانزینخانا بێرسومە و بارزگانێ فرۆتنا گازا مالان ل سنورێ قەزا ئامێدیێ بۆ ئەڤرۆ گۆت: (نزم و بلندبوونا بھایێ پەنزین و گازا مالان پەیوەندی ب ھەبوونا شەر و ئالوزیان ڤە ھەیە، بەلێ نابیتە سەدەم کو ب ئێکجاری نەمینیت، نھا ئەم گازا مالان وەکو بازرگانی ل بازیان و کەرکووک بۆ بازارێن ناڤخوەیێن ھەرێما کوردستان و پارێزگەھا دھۆکێ دئینین، گەلەک ژی یا زۆرە).
زێدەتر گۆت: (نھا گازا مالان ھەڤبەرکی ل گەل ھەیڤا بوری گەلەک ئەرزانتر بوویە، بەرمیل ب 160 ھزاران و کێمتر دھێتە فرۆتن و رەنگە ھێشتا ژی ئەرزان ببیت، ئەگەر ژی دزڤریت کو رێژەیەکا زۆرا خەلکی پەنا بۆ بکارئینانا داران بریە و دەنگوباسێن وێ یەکێ ژی ھەنە کو گاز ل سەر مالان ل دەمەک نێزیک بھێتە بەلاڤکرن).
ژ لایەکێ دی ڤە عەبدولسەمەد تێلی ژ لژنا سوتەمەنیا جڤاتا پارێزگەھا دھۆک بۆ ئەڤرۆ گۆت: (ھەتا نھا چو دەنگوباس نینن کو گازا سپی ل سەر مالان ل ھەموو سنورێ پارێزگەھا دھۆکێ بھێتە بەلاڤکرن، بەلێ رەنگە ل حەفتیا بھێت دەست ب بەلاڤکرنا گازا مالان ل دەڤەرێن چیایی بھێتە کرن).
زێدەتر گۆت: (ھەر چەندە ھێشتا رێژەیا پێدانا گازێ و رێژا وەرگرتنا پارەی ژ وەلاتیان نەھاتیە دیارکرن، بەلێ دی َوەکو ھەموو سالان بیت ئانکو بەرامبەر پێدانا 200 لیترێن گازا سپی دێ 45 ھزار دینار ھێنە وەرگرتن).
ھەر چەندە ئەڤی ئەندامێ لژنا سۆتەمەنیێ ل جڤاتا پارێزگەھا دھۆک ئاماژە ب وێ چەندێ کر کو ھێشتا دیار نەبوویە کا دێ ب سەر ھەموو پارێزگەھێ دا ھێتە بەلاڤکرن، بەلێ جەمیلا محەمەد جێگرا سەرۆکا فراکسیۆنا پارتی دیموکراتی کوردستان ل جڤاتا پارێزگەھێ بۆ رۆژناما ئەڤرۆ گۆت: “بڕیارە گازا سپی ل سەرانسەری پارێزگەھا دھۆکێ بھێتە بەلاڤکرن و ل دەسپێکێ ژی دێ ل دەڤەرا ئامێدیێ دەسپێکەت، ژ بەر کو دەڤەرەکا چیایی یە”.
