ل دووڤ بڕیارەکێ باج ل سەر ئینانا کەلوپەلان دھێتە زێدەکرن
ئەڤرۆ نيوز:
دارایی ھۆشداریێ ددەت ھەکە بڕیارەکا حوکمەتا عیراقێ ل ھەرێمێ بھێتە ب جھئینان، گرانی دێ کەڤیتە بازارێن ھەرێمێ و بھایێ تشتان دێ بلند بیت، پەرلەمانتارەکێ کورد ژی دبێژیت: حوکمەتا عیراقێ بڕیار دایە باجێ ل سەر ئینانا کەلۆپەلێن ل خالێن سنووری زێدە بکەت.
د دووماھی کۆمبوونا جڤاتا وەزیرێن عیراقێ دا، بڕیارا زێدەکرنا باجێ ل سەر ئینانا کەلوپەلان ل رێیا خالێن سنووری ھاتیە دان و مەرەم ژێ زێدەکرنا داھاتی یە و بزاڤەکە ژی بۆ پشتەڤانیکرنا بەرھەمێ ناڤخوە.
د ڤی واری دا قادر محەمەد، ئەندامێ لژنا دارایی ل جڤاتا نوونەرێن عیراقێ خویا کر، ھەکە عیراق بڕیارا زێدەکرنا باجێ ل سەر ئینانا کەلوپەلان ل رێیا خالێن سنووری دەربێخیت، دێ ھەرێمێ ژی ڤەگریت، چونکو خالێن سنووری یێن ھەرێمێ گومرگێن ئتحادی نە و سەر ب حوکمەتا عیراقێ ڤە نە.
قادر محەمەد بۆ NNA گۆت: “ئەوا ب مەترسی ژ ب جھئینانا ڤێ بڕیارێ ئەوە، ئێکسەر بھایێ ئینانا ھندەک کەلوپەلان ل بازارێن ھەرێما کوردستانێ دێ گران بیت”.
