ل دھۆکێ زارۆیێن ئاواران دێ چنە قوتابخانێ
ئەڤرۆ نیوز، سالار دۆسکی:
رێڤەبەرێ رێڤەبەریا ئاڤاھیان رێڤەبەریا گشتی یا پەروەردا پارێزگەھا دھۆکێ بۆ مالپەرێ ئەڤرۆ نیوز دیارکر کو بڕیار ھاتیە دان سێ قوتابخانێن 12 رێزی بۆ ئاواران بھێنەدانان.
ئەندازیار فەرسەت سەعید، رێڤەبەرێ رێڤەبەریا ئاڤاھیان رێڤەبەریا گشتی یا پەروەردا پارێزگەھا دھۆکێ، گۆت: “ل سەر پارێ عیراقێ بۆ ئاواران تەرخانکری کو ب ھاتنا سالح موتلەک بۆ دھۆکێ کو سێ قوتابخانێن 12 رێزی بھێنە دروستکرن و ئاڤاکرنا قوتابخانە ژی ل قووناغا (ئیحالێ) دەربازبوویە”.
رێڤەبەرێ رێڤەبەریا ئاڤاھیان دیارکر ژی کو ئەڤ کارە ب رێیا پەروەردێ نەھاتیە راگەھاندن، زێدەباری ئاڤاکرنا نەخۆشخانەکێ، ناڤبری گۆتژی: “ئەڤ قوتابخانە ب شێوێ کابینان دێ ھێنە دروستکرن و دێ د ناڤ کەمپان دا ھێنە دروستکرن و ئەڤ کارە ب لەز یێ دھێتە کرن”.
