ل دھۆک 258 ھزار زارۆ دێ ھێنە ڤاکسیندان
ئەڤرۆ نیوز، رەڤین سالح لاوەند:
رێڤەبەریا گشتی یا ساخلەمیا پارێزگەھا دھۆکێ رابوون ب ئەنجامدانا ھەوا ڤاکسندانا دژی نەخۆشیا ڤالنجا زارۆیان، سەرپەرشتا ھەوا ڤاکسندانێ د داخویانیەکێ دا بۆ دەزگەھێن راگەھانێ گۆت: “ھەوا ڤاکسیندانێ دێ بۆ 258 ھزار زارۆیان بیت، کو ٦٠ ھزار ژ وان زارۆیێن ئاوارەیێن پارێزگەھێن دێ ھێنە ڤاکسیندان”.
د. لوما حازم سەرپەرشتا ھەوا ڤاکسیندانێ دیارکر کو ھەوا ڤاکسندانێ دژی نەخۆشیا فالنجا زارۆیان ب ھەفکاریا رێڤەبەریا گشتی یا ساخلەمیا پارێزگەھا دھۆکێ دەست پێکر یە و گۆت: “ئەڤە جارا شەشێ یە، ڤاکسیندان دھێتە ئەنجامدان، ژ بەر مەترسیا ڤالنجا زارۆیان کو ماوەیەکە پەیدا بووی”.
زێدەتر گۆت: “تێمێن مە یێن ساخلەمیێ ل سەرانسەری پاێزگەھا دھۆکێ دگەرن، کو 651 تیمن، ژ ڤان تیمان، ٤٧ د ناڤ بنگەھێن ساخلەمیێ نە یێن دی ھەموو د گەروکن”.
ئەڤ ھەوا ڤاکسیندانێ ژ وان زارۆیان دگریت یێن ئێک رۆژی ھەتا پێنج سال و برَیارە 258 ھزار زارۆ بھێنە ڤاکسیندان، سەرپەرشتا ھەوێ گۆتژی: “ژ ڤان زارۆیان 60 ھزار زارۆیێن ئاوارەنە یێن پارێزگەھێن دی، دێ ل دھۆک ھێنە ڤاکسیندان و 10 ھزار زاۆیێن ئاوارەیێن کەمپا دومیز ژی یێن ل گەل”.
حەمزە رەزیکی بەرپرسیێ راگەھاندنا ساخلەمیا دھۆکێ خویارکر کو بۆ دەمێ پێنج رۆژان دێ ئەڤ ھەوە یا بەردەوام بیت و گۆت: “ل ھەموو کەمپێن پەنابەران و ل ھژمارەکا قوتابخانە و باخچێن زارۆیان دێ چالاکی ھەبن”.
زێدەتر گۆت: “بۆ دەمێ پێنج رۆژان دو کەمپینە دێ ل ناڤ باژێری د کاری دابن بۆ ھشیارکرنا وەلاتیان ل دۆر ڤاکسیندانێ”.
مھاباد عەبدلمەجید عەبدلحەمید رێڤەبەرا باغچێ بژارە کو چالاکی ل وێرێ دەستپێکربوو دیارکر کو ئەرکەکێ پێدڤی یە د گەل ساخلەمیا دھۆکێ ھاریکار بن بۆ ئەنجامدانا ڤان جورە چالاکیان، دا کو زارۆیێ ساخلەم بیت و یێ دوور بیت ژ نەخوشیان.
