ل دەڤەرێن كوردستانی ب ئاشكرا دژایەتییا كوردان دهێتە كرن
بەرپرسێ مەكتەبا رێكخستنا كەركووك- گەرمیان یا پارتی راگەهاند: سەرۆك بارزانی پەیامەكا رۆهن دا بەغدا كو پێدڤییە رێگریكرن ب دووماهی بهێن ئەگەر نە ب وی شێوەی ناراوەستین.
هیوا ئەحمەد، بەرپرسێ مەكتەبا رێكخستنا كەركووك- گەرمیان یا پارتی دیموكراتی كوردستان گۆت» كێشەیا جۆتیاران ژ كەس و ئالییەكی مەزنترە و دژایەتیكرنا ئاشكرایە بۆ كوردان ل وان دەڤەران و نەبوونا ئێكڕێزییا كوردان ژی ب دەلیڤە بۆ كاری هاتیە بكارئینان».
بەرپرسێ مەكتەبا رێكخستنا كەركووك- گەرمیان یا پارتی ئاماژە ب وێ چەندێ ژی كر» سەرۆك بارزانی پەیامەكا رۆهن دایە بەغدا كو پێدڤییە رێگرییكرن ب دوماهی بهێن ئەگەر نە ب شێوەی ناراوەستین».
ل رۆژا دوشەمبییا بۆری 17 شواتا 2025، لەشكرێ ئیراقێ ل گوندێ شەناغە ل كەركووكێ، بزاڤكر رێگریێ ل كێلانا زەڤیێن جۆتیارێن كورد بكەن، جۆتیار روو ب روویێ وان بوون و گەفێن لەشكری پشت گوه هاڤێتن و دەست ب كێلانا زەڤیێن خوە كر.
لەشكرێ ئیراقێ ئاماژە ب وێ چەندێ كر، بڕیار یا بۆ هاتیە رێگریێ ل جۆتیارێن كورد بكەن كو زەڤیێن خوە بكێلن، بەلێ جۆتیارێن كورد ژی د رژدبوون ل سەر وێ چەندێ كو دڤێت زەڤیێن خوە بكێلن و ئاخا خوە بجهـ نەهێلن.
