ل سەر ڕاسپاردەیا سەرۆك بارزانی هەمی زیاندارێن زاخۆ دێ هێنـە قەرەبووكرن
زاخۆ، عەلی حاجی:
سەرپەرشتێ ئیدارەیا سەربخوە یا زاخۆ د كۆنگرەیەكێ رۆژنامەڤانی دا دیار كر، قووناغا ئێكێ یا قەرەبووكرنا وەلاتیێن زیاندارێن لەهیان ب دووماهی هات و قووناغا دویێ دەستپێكریە و دبێژیت: ل دووڤ راسپاردەیا سەرۆك بارزانی هەموو زیاندار دێ هێنە قەرەبووكرن.
گوهدار شێخو، سەرپەرشتێ ئیدارەیا سەربخوە یا زاخۆ گۆت: «ل سەر ڕاسپاردەیا سەرۆك بارزانی و سەرەدانا مەنسور بارزانی قووناغا ئێكێ یا زیانڤێكەڤتیێن لەهیان ل زاخۆ دەستپێكربوو، د قووناغا ئێكێ دا ٤١٠ خێزان هاتنە قەرەبووكرن و هەر مالەكا مابیت دڤێت بهێتە قەرەبوو كرن، د نوكە دا قووناغا دویێ یا قەرەبوویان دەستپێكریە و دێ بۆ جهێن بازرگانی و ماركێت و هندەك جهێن دیتر بیت، بناڤێ خەلكێ ئیدارەیا سەربخوە یا زاخۆ سوپاسیێن خوە ئاراستەیی سەرۆك بارزانی دكەین، بۆ وان هاریكاریێن پێشكێشی دەڤەرا مە كرین و هەر ل سەر ڕاسپاردەیا جەنابێ وی ژی دڤێت هەمی زیانڤێكەڤتیێن زاخۆ بهێنە قەرەبووكرن، دیسا ب گشتی ل ئیدارەیا سەربخوە یا زاخۆ زیان گەهشتیە 624 جهان».
ناڤبری گۆتژی: «ژ ئەگەرێ لەهیان زیان گەهشتبوو پڕۆژەیێن حكومەتێ ژی، وەكی: پڕۆژەیێ ئاڤا زاخۆ و كۆڕنیشێ زاخۆ و پێنج قوتابخانەیان و كارەبا زاخۆ، لێ سەرۆكێ حكومەتێ رازیبوون دیاركریە ل سەر مەزاختنا گوژمەكێ پارەیی بۆ نووژەنكرنا وان جهان».
