ل شوونا کۆبوونا ئاھێن خوارنێ دێ کارتا زیرەک ھێتە چێکرن
ئەڤرۆ:
ب بریارەکا نوو یا حوکمەتا ھەرێما کوردستانێ کۆبوونا ئاھێن خورانێ دێ ھێتە گوھۆرین بۆ کارتا زیرەک.
وەزیرێ بازرگانی و پیشەسازی ل حوکمەتا ھەرێما کوردستانێ سامال سەردار بۆ SNN دیارکر کو نوکە کار دھێتە کرن کو کۆبوونا ئاھێن خورانێ ببیتە کارتا زیرەک، گۆت ژی ڤێ پێنگاڤێ بریارا جڤاتا وەزیران ل سەر ھاتیە وەرگرتن و چاڤەرێی تەرخان کرنا بودجەکێ دکەن بۆ بجھئینانا ڤێ بریارا نوو.
سامال سەردار ئاماژە ب وێ چەندێ ژی کر کو نوکە مژوولی ئامادەکرنا کارێ تەندەرانە و دانوستاندنان ل گەل کۆمپانیێن تایبەت ب ڤی بیاڤی ڤە دکەن ھەتا کو بشێن د بەرژەوەندیا وەلاتیان دا کاری ل سەر بکەن، گۆت ژی ڤی بابەتێ گوھۆرینا کۆبوونا ئاھێن خورانێ بۆ کارتا زیرەک ل بەغدا کار ل سەر دھێتە کرن.
وەزیرێ بازرگانی و پیشەسازی ل حوکمەتا ھەرێمێ ھەروەسا دیارکر کو دێ بزاڤان کەن داتایێن نوو یێن ھەموو کوردستانێ وەربگرن ھەروەسا ئاستێ ژیارا وەلاتیان ژی وەربگرن، ب رەنگەکی کو ئەو کەسێن پێدڤی ب پشکەکا پترا ئاھێن خوارنێ یە زێدەتر بۆ بھێتە دان، یان ھەکە پشکا خوە یا کەرەستێن خوارنێ بگوھۆرن بۆ پارەی رەوشا وەلاتیان ل بەر چاڤ بھێتە وەرگرتن.
