“ل نافخۆ دەرڤە پشتەڤانیا سەرۆک بارزانی دھێتەکرن بۆ دەولەتا کوردی”
ئه‌ڤرۆ نيوز:
سەرکردەیەکێ پارتی دیموکراتی کوردستان ئیماژە ب قۆناغا راگەھاندنا دەولەتا کوردی دکەت و دبێژیت، نوکە دەمێ ریفڕاندۆمێ یە بۆ راگەھاندنا دەولەتا کوردی ل باشورێ کوردستانێ و ئاشکراکر، کو سەرۆک بارزانی ئەف پەیام بلندکریە و ئەم پشتڕاستین ل نافخۆ و دەرڤەژی پشتەڤانی ل پەیاما سەرۆک بارزانی دھێتەکرن.
دکتۆر عەبدلا ئاگرین، بەرپرسێ مەکتەبا ڤەکولینێن پارتی دیموکراتی کوردستان بۆ رۆژناما ئەڤرۆ گۆت: مادەم ل وەلاتێ مە دیموکراتی ھەیە دڤێت ریفڕاندۆمژی بھێتەکرن ھەتا بزانین مللەتێ مە چو دخوازن، بەلێ بۆ ئەنجامدانا پڕۆسا ریفڕاندۆمێ من بۆچوونەکادی ھەیە، ئەوژی ئەنجامدانا ریفڕاندۆمێ تنێ بۆ راگەھاندنا دەولەتا سەربخوە بیت نەک بۆ تشتەکێ دی، ژبەرکو زۆرجارا دھێتەگۆتن بلا ریفڕاندۆم بھێتەکرن مەرج نینە ئێکسەر دەولەت بھێتە راگەھاندن، ئەنجامدانا ریفڕاندۆمێ دێ ئەڤان بۆچوونێن جۆداژی چارەسەرکەت، ھندەک ھێز دگەلدا نە و ھندەک رەت دکەن دەمێ دەولەتێ نینە و ھندەک دبێژن جارێ دەم نەھاتیە بۆڤێ چەندێ دەمێ ریفڕاندۆم ھاتە رێڤەبرن دێ ئەف ئاریشەژی دوماھی ھێت، ئەگەر مە بڤێت سەر ب عێراقێ بین ئەڤە بلا بچینەڤە بەرسینگێ بەغدا و چو پێنەڤێت، ئەگەر مە دەولەت دڤێت نوکە دەلیڤەیە بۆ چێکرنێ، رەوشا دەڤەرێ و نافخۆ یا گونجایە بۆ راگەھاندنا دەولەتا کوردی، چونکە مافێ خەلکێ ھەرێما کوردستانێ یەو چەندین دەولەتێن جیھانی پشتەڤانیا خوە بۆ دەولەتا کوردی ئاشکراکریە، ئەگەر دەولەتژی ھەبن دژی سەربەخۆیا کوردستانێ بن ئەڤە ئاریشەیا وانە و بۆ چێکرنا دەولەتێ نابیت ئەم پشتا خوە ب چ دەولەتا گرێدەین فلان یا رازیە و یان فلان رازی نینە.
ئاگرین گۆتژی” ب دیتنا من دەولەتا کوردی یا تاپۆنینە لسەر چو کەس و لایەنەکێ سیاسی لھەرێما کوردستانێ، بەلێ راستیەک ھەیە ئەوژی ئەڤە ئەڤێ نوکە پەیاما دەولەتا کوردی بلندکری سەرۆک بارزانیە و سەرۆک بارزانی وەکە کەسەکێ ھەژی پێنگاڤ بۆ ئاڤاکرنا دەولەتا کوردی ھاڤێتینە، لێ نابیت خەلک وەسا ھزر بکەت ئەڤە تنێ داخوازا پارتیە راستە پارتی وەک پارتەکا سیاسی دگەل چێکرنا دەولەتا کوردیە و خەبات بۆڤێ مەرەمێ کریە، بەلێ سەرۆک بارزانی دەربڕینێ ل خواستا ھەموو جەماوەری دکەت، باشترین کەس بۆ دەولەتا کوردی ئەگەر بھێتە راگەھاندن جەنابێ سەرۆک بارزانیە، ژبەرکو ئەم وەکە سەرکردایەتیا پارتی پشتەڤانیێ ل پێنگاڤا سەرۆکی دکەین و ژلایێ جەماوەری زۆرترین پشتەڤانی ھەیە و ھەتا دناڤ لایەنێن سیاسی ژی، ژلایێ دەرڤەژی خویایە ولاتێن بیانی دزانن ئەگەر سبەی دەولەتا کوردی ھاتە ئاڤاکرن، ئەڤە پشتڕاستن دێ وەکە کەسەکێ حەکیم دەولەتەکبیت ببیتە جھێ ئەمانێ بۆ دەولەتێن جیران و جیھانێ.