ل هەرێما کوردستانێ بۆ هەر 30 هزار کەسان ئامیرەکێ هەناسەدانا دەستکرد هەیە
ئەڤرۆ نیوز:
ل ئێک نەخۆشخانێن تایبەت ب ڤایرۆسێ کۆرۆنا ل هەرێما کوردستانێ دشێت 55 تووشبوویێن وی ڤایرۆسی تێدا بنڤینیت، بەلێ ب تنێ 11 ئامیرێن هەناسەدانێ یێن دەستکرد تێدا هەنە.
نوکە هەرێما کوردستانێ پتر ژ شەش ملیۆن ئاکنجیان هەیە، کێمتر ژ 200 ئامیرێن هەناسەدانا دەستکرد هەنە، شیانێن سنوردار کو پتر ژ هەر 30 هزار کەسان، ئامیرەک بەردکەڤیت.
وەزارەتا ساخلەمیێ بۆ دابینکرنا جهی، پلانا ئەی، بی و سیی دانایە، نوکە هەرێما کوردستانێ د قۆناغا ئەی دایە و دۆخێ هەرێمێ ل ژێر کۆنترۆلێ دایە، بەلێ قۆناغا سی یا مەترسیدارە، هەکە دۆخێ هەرێمێ بگەهیتە وی ئاستی، دێ هەموو نەخۆشخانە بۆ تووشبوویێن کۆرۆنا یێ هێنە تەرخان کرن، هەر چەندە ساخلەمیا هەموو تووشبوویێن کۆرۆنا یێ زۆر یا باشە.
سەرەرای کێمیا ئامیرێ هەناسەدانا دەستکرد، شیانێن تێستا کۆرۆنا یێ ژی ب ئەگەرێ کێمیا کیت یا سنوردارە، بەلێ نوکە پێدڤیێن نێزیکی حەفت هزار تێستێن کۆرۆنا یێ ل هەرێما کوردستانێ هەنە، رۆژانە ل تاقیگەهێن کوردستانێ دشێن تێستا کۆرۆنا یێ بۆ 200 هەتا 300 گومانلێکریان بکەن.
