ل پايته‌ختێ ئه‌ڤغانستان ته‌قينه‌كا خوه‌كوژى روودا
ئه‌ڤرۆ نيوز:
ل كابۆل يا پايته‌ختێ ئه‌ڤغانستان ته‌قينه‌كا مه‌زن روودا و كوشتى و بريندار هه‌بوون، رێكخراوا داعش ژى به‌رپرساتيا وێ ته‌قينێ ب ستوويێ خوه ڤه گرت.
سپێده‌هيا ئه‌ڤرۆ رۆژا دوشه‌مبى 25ى چريا ئێكێ 2017 ل نێزيك نڤيسينگه‌ها سه‌ره‌كى يا ده‌زگه‌هێ هه‌والگه‌ريا ئه‌ڤغانستان ل كابۆل يا پايته‌خت ته‌قينه‌كا خوه‌كوژى روودا و ژ ئه‌گه‌رێ وێ چه‌ندێ ب كێمى شه‌ش كه‌سان گيانێ خوه ژ ده‌ست دا و ژماره‌ك ژى بريندار بوون.
ل دووڤ گۆتنا به‌رپرسێن حكومى يێن ئه‌ڤغانستان ل ده‌مێ چوونا كارمه‌ندێن ده‌زگه‌هێ هه‌والگه‌ريێ بۆ ده‌وامێ كه‌سه‌كێ خوه‌كوژ خوه پێڤه ته‌قانديه.
ئه‌ڤ ته‌قينه حه‌فتيه‌كێ پشتى وێ هێرشا دى يا خوه كوژى بۆ سه‌ر بنگه‌هێ مه‌شق و راهێنانێن هێزێن ئه‌ڤغانستان دهێت، به‌لێ خوه‌كوژ هاتبوو كوشتن به‌رى قوربانيێن زۆر ل پشت خوه ب هێليت.
د هه‌يڤا گۆلانا ئه‌ڤ ساله ژى ته‌قينه‌كا مه‌زن ل جهێ داموده‌زگه‌هێن حكومى يێن وى وه‌لاتى روودا بوو، ژ ئه‌گه‌رێ وێ چه‌ندێ ژى زێده‌ترى 150 كه‌سان گيانێ خوه ژ ده‌ست دابوو.
