ل چیایێ مه‌تینا هێرشی هێزێن پێشمه‌رگه‌ی هاته كرن
ئامێدیێ، مه‌حمود نهێلی:
هێزێن پێشمه‌گه‌رێ كوردستانێ ل چارچه‌لا ل چیایێ مه‌تینا د ده‌مێ ئه‌ركی دا راستی هێرشه‌كا چه‌كدارێن په‌كه‌كێ بوون و چ زیان نه‌گه‌هشتنێ.
فه‌ریق جه‌مال محه‌مه‌د، سه‌رۆك ئه‌ركان ل وه‌زاره‌تا پێشمه‌رگه‌ی بو رۆژناما ئه‌ڤرۆ دیار كر، سپێده‌هیا دوهی 24/7/2021 چه‌كدارێن په‌كه‌كێ ته‌قه ل هێزێن پێشمه‌رگه‌ی ل چیایێ مه‌تینا ل سنوورێ قه‌زا ئامێدیێ كریه و گۆت: “ئه‌ڤه چه‌ندین جاره چه‌كدارێن په‌كه‌كێ ته‌قێ ل هێزێن پێشمه‌رگه‌ی دكه‌ن، پێشمه‌رگه پارێزڤانێ خاكا هه‌رێما كوردستانێ یه و مافێ وانه ل هه‌ر جهه‌كێ هه‌رێما كوردستانێ بیت ب پارێزیت”.
ناڤهاتی دیار ژی كر، ژ ئه‌گه‌رێ شه‌ڕێ د ناڤبه‌را په‌كه‌كێ و توركیا دا هژماره‌كا زۆرا گوندێن ده‌ڤه‌رێ هاتینه به‌ردان و خه‌لكێ وان ده‌ڤه‌ران ئاواره بووینه.
فه‌ریق جه‌مال محه‌مه‌د ئاشكرا ژی كر كو په‌كه‌كه رێزێ ل سه‌روه‌ریا هه‌رێما كوردستانێ ناگریت و بوویه ئه‌گه‌ر كو سوپایێ توركیا سنۆرێن هه‌رێما كوردستانێ ده‌رباز بكه‌ت.
