ل کوردستانێ 764 وەلاتیان نۆشدارەک بەردکەڤیت
ئەڤرۆ نیوز:
ئەندامەکێ لیژنا ساخلەمیێ ل پەرلەمانێ کوردستانێ ئاشکراکر، ھێشتا کەرتێ تایبەتێ ساخلەمیێ ل دووڤ حەز و پێدڤیان پێش نەکەڤتیە و گۆت: ھەر نۆشدارەکی ھەتا سێ پەرستار دگەھنێ و ئەڤە باشترە ژ ھەبوونا نۆشداران، ئانکو 22 ھزار و 60 کارمەندێن ساخلەمیێ ل کوردستانێ ھەنە، ھەر 174 کەسان پەرستارەک دگەھیتێ
د. عەبدوللا رێکانی، ئەندامێ لژنا ساخلەمیێ ل پەرلەمانێ کوردستانێ بۆ رۆژناما ئەڤرۆ گۆت: 42 نەخۆشخانێن ئەھلی ل ھەرێما کوردستانێ ھەنە و پێکھاتینە هزار و 267 تەختێن نڤستنێ بۆ نەخۆشخانان ب خوە ڤەدگرن، ئانکو ھەر 147 نۆشداران نەخۆشخانەکا ئەھلی دگەھیتێ و ھەر چار هزار و 532 وەلاتیان تەختەک دگەھیتێ، ھەمان ئەندامێ پەرلەمانێ کوردستانێ ئاشکراکر، ھەکە ئەڤ ھەژمارێن نەخۆشخانێن ئەھلی بھێنە بەراوردکرن ل گەل نەخۆشخانێن حکومی، کو 74 نەخۆشخانێن حکوومی ل ھەرێما کوردستانێ ھەنە، ئانکو ھەر 78 ھزار وەلاتیێن کوردستانێ نەخۆشخانەکا حکوومی دگەھیتێ و ھەر 804 وەلاتیان تەختەکێ نڤستنێ دگەھیتێ و ھەر 764 وەلاتیان نۆشدارەک دگەھیتێ، ئەڤە ل دووڤ ستاندارێن ساخلەمی یێن جیھانی 500 ھەتا 600 وەلاتیان نۆشدارەک ھەیە و ب ڤێ ھژمارێ ھژمارا نۆشدار و نەخۆشخانێن کوردستانێ نێزیکی ستاندارێن جیھانی یە.
د. عەبدوللا رێکان گۆت: ھەر نۆشدارەکی ھەتا سێ پەرستار دگەھنێ و ئەڤە باشترە ژ ھەبوونا نۆشداران، ئانکو 22 ھزار و 60 کارمەندێن ساخلەمیێ ل کوردستانێ ھەنە، ھەر 174 کەسان پەرستارەک دگەھیتێ، ھەکە دووڤچوونەکێ ل سەر بکەین کەرتێ ساخلەمیێ و کارمەندێن ساخلەمیێ پتر زێدەبوویە ژ نۆشداران و دیسا ئەو کارمەندێن ل بەر دەرمانخانان کار دکەن.
ئارمانج و دروشمێ مە نە ئەوە کا مە چەند ھژمار و کارمەند و نۆشدار ھەنە، بەلکو کا ب چو رەنگ و شێوە دێ شێن پتر خزمەتا نەخۆشان کەین ب ڤێ ھەژمارا مە ھەی و ل بەردەست، نەخۆشخانەکا وەک ئازادی پتر ژ 500 تەختان ھەنە و ژ سەرجەمێ 24 دەمژمێران ب تنێ چەند دەمژمێران کار دکەت، ئانکو مە مفا ژ ڤێ سازیێ وەرنەگرتیە، پتریا نۆشداران ل نەخۆشخانێن ئەھلی دەوامێ دکەن و نەخۆشخانێن خوە ھەنە، بەرامبەر ل نەخۆشخانێن حکوومی تە کادرەکێ باش ھەیە و تە نۆشدار ھەنە، لێ ب تنێ چەند دەمژمێران کار دکەن.
د. عەبدوللا رێکانی زێدەتر دبێژیت: سەرەرایی ڤێ چەندێ ل سالا 2014 نشتەرگەریێن ھاتینەکرن ل کوردستانێ 209 ھزار نشتەرگەری بووینە ژ ھەموو جۆران، مەزن و ناڤنجی و بچووک و ئەگەر ئەڤە ل کەرتێ تایبەت ھاتبانەکرن دا ب ملیۆن دۆلار بۆ کەرتێ تایبەت چن، ئانکو ھەکە ئەڤ ھەژمارە ل سەر رۆژێن سالێ بھێتە پارەکرن رۆژانە و بێ راوستیان 570 نشتەرگەری ھاتینەکرن، ئانکو تشتەکێ باش یێ دھێتەکرن لێ نەیێ ب رێک و پێکە.
ھەمان ئەندامێ پەرلەمانێ کوردستانێ ئاشکراکر کو ل سالا 2014 پشکنینێن ھاتینەکرن 15 ملیۆن و 400 ھزار پشکنین بووینە، وەک ھەژمارا دباشین، لێ ئەو مفایێ وەرگرتی ژ ڤێ ھژمارێ ھێشتا مە نەکریە، چونکە گەلەک لاوازی د سیستەمێ مە یێ ساخلەمیێ دا ھەنە.
