ل گه‌رميان هێزه‌كا حه‌شه‌د شه‌عبى هاتيه دروستكرن و به‌رپرسێ وێ ئێكه‌تيه
ئه‌ڤرۆ نيوز:
حه‌فتيناما باس راپۆرته‌ك به‌لاڤكريه و تێدا پشت به‌ستن ل سه‌ر ژێده‌ركى وه‌لاتيه‌كێ كورد يێ خوجهيێ كه‌لار هێزه‌كا 500 كه‌سى يا سه‌ر ب حه‌شه‌د شه‌عبى دروست كريه.
ئاماژه ب وێ چه‌ندێ ژى كريه كو ئه‌و كه‌س كو د بنيات دا ئێكه‌تيه و هه‌لگرا پلا موقه‌دمه، ناڤێ چه‌ندين گه‌نجێن كه‌لار نڤيسينه و هێزه‌كا حه‌شه‌د شه‌عبى يا 500 كه‌سى ئێكئينايه كو ژ خه‌لكێ خانه‌قين و كه‌لار پێك دهێت.
ب پشت به‌ستن ل سه‌ر ژێده‌رێ خوه ئاماژه ب وێ چه‌ندێ كريه كو 400 ژ وان 500 كه‌سان ب رێيا فورمه‌كا تايبه‌ت ژ لايێ مه‌لبه‌ندێ ئێكه‌تى نشتيمانى كوردستان ڤه پێ هاتينه دان دا كو بكه‌نه چه‌كدار و ببنه مووچه‌خورێن حه‌شه‌د شه‌عبى.
ئه‌كره‌م سالح، به‌پرسێ لقێ گه‌رميان يێ پارتى ديموكراتى كوردستان ته‌كست ل سه‌ر ڤان گۆتنان كر و گۆت: “ئه‌م دژى ڤێ هێزێ ينه، چونكو حوكمه‌تا هه‌رێمێ ب فه‌رمى هه‌لويستێ خوه دژى دروستبوونا وان هێزان ل كوردستانێ راگه‌هانديه”.
دا زانين ژى كو ده‌سته‌لاتا ده‌ڤه‌رێ چاڤێ خوه ل ڤێ هێزێ د نقينن ژ به‌ر كو پتريا ئه‌ندامێن د ناڤا ڤێ هێزێ دا هاتينه تۆماركرن لايه‌نگر و پشته‌ڤانێن ئێكه‌تيێ نه.
شه‌هاب حاجى هاشم قايمقامێ كه‌لار ژى بۆ ڤێ حه‌فتينامێ ئه‌ڤ بابه‌ته پشت راست كريه و دبێژيت: “من ڤان رۆژان يا زانى و دێ ل گه‌ل ئاسايشێ ئاخڤم و پێزانينێن ته‌مام ل سه‌ر وه‌رگرم و هه‌ر هێزه‌كا ژ ده‌رڤه‌ى هێزا پێشمه‌رگه‌يێ كوردستانێ بيت رێ پێ ناهێته دان و نه‌يا قانوونى يه”.
ئه‌ڤ حه‌فتينامه ئاماژێ ب وێ چه‌ندێ دكه‌ت كو ئه‌وان بزاڤ كريه په‌يوه‌نديێ ب فه‌رماندێ ڤێ هێزێ بكه‌ن، به‌لێ تله‌فۆنێن وى ل به‌ر ده‌ست نه‌بووينه.
