ل گه‌ل هلاتنا تیرۆژكێن رۆژا 15 ئادارێ سێمێل ب تمامى هاته رزگاركرن
ئه‌ڤرۆ نیوز:
ل سپێده‌هیا رۆژا 14/3/1991 په‌یامێ رزگاركرنا باژێرێ دهۆكێ هاته راگه‌هاندن و سه‌رهلدانێ ده‌سپێكر، ب ڤى ئاوایی كوردپه‌روه‌رێن سێمێلێ ژى هه‌مى كۆمبوون و وێنێ سه‌رۆك مه‌سعود بارزانى بلندكرن و رێپیڤانا بێ دووماهى ژ چه‌ند كه‌سه‌كان و ژ تاخه‌كێ هه‌ژارن ب درووشمێن پارتی و كوردایه‌تی و تلیلیێن دایكان ده‌ستپێكر و كه‌تنه جادێ و ب رێ كه‌تن و ل گه‌ل هلاتنا تیرۆژكێن رۆژا 15/3/1991 باژێرێ سێمێلێ ب خوینا گه‌شا شه‌ش شه‌هیدێن قه‌هره‌مان و چه‌ند برینداران، ژ داگیركه‌ران ب تمامى هاته رزگاركرن و زولما داگیركه‌ران راكر و به‌رپه‌ره‌ك نوو ل به‌ر خه‌لكێ ده‌ڤه‌رێ ڤه‌كر.
سه‌رهلداى جارا ئێكێ گه‌هشتنه باره‌گه‌هێ به‌عسیان ل نیڤا مسیریكێ و شه‌هید (حه‌بیب بابیر لاوه‌ند) گولا ئێكى به‌ردایێ و خۆرتێن سه‌رهلداى ب دووڤدا ئاگر به‌ردانێ، پاشان به‌ر ب باژێرێ سێمێلێ كه‌تنه ڕێ و هێدى هێدى خه‌لك گه‌هشتنه رێپیڤانێ و هه‌ژمارا وان زێده‌بوو.
ده‌مێ سه‌رهلداى گه‌هشتینه سێمێلێ بوونه دو گرۆپ، ئێك ل بنی د ناڤ قه‌سرێن زه‌ر ڕا چوو، یا دى ژى ل سه‌رى د سه‌ر پانزینخانا كه‌ڤن ڕا كو هه‌ردو ل بنگه‌هێ پۆلیسان بگه‌هنه ئێكدو، هه‌تا خالا ده‌ستنیشان كرى چو ئاریشه نه‌بوون و ل ده‌سپێكێ هه‌ڤالێن سه‌رى باره‌گه‌هێ ئه‌منێ ستاند و ئاگر به‌ردایێ و گه‌هشتنه بنگه‌هێ پۆلیسان یێن دى ژى گه‌هشتنه بن جادێ به‌رانبه‌رى بنگه‌هى و خه‌لكێ سێمێلێ ژى ب هه‌ژماره‌كا بۆش ته‌ڤلى بوو، ئه‌ڤه هه‌مى هاته‌كرن و چو به‌هنگاریه‌كا وه‌سا نه‌بوو، رێڤه‌به‌رێ پۆلیسان خوه راده‌ستى سه‌رهلدایان كر و دووماهى بنگه‌ه باره‌گه‌هێ (ره‌فیق)ێن به‌عسیان بوو، كو شه‌ره‌كى دژوار دكرن، وان هه‌مى جۆرێن چه‌كى هه‌بوون و یێن سه‌رهلدایان ب تنێ تفه‌نگ بوون. هه‌ڤال (ره‌شید عه‌بدى خالد) بزاڤ كر، ئالایێ زه‌ر ل سه‌ربانى پۆلیسان بچكلینت كو ل به‌رانبه‌ر باره‌گه‌هێ ره‌فیقان بوو كو د ناڤ باره‌گه‌هێ وان دا بیكه‌یسیه‌ك دانا بوو، رێ نه‌ددا كه‌سێ، ده‌مێ وان ره‌شید دیتی ئێكسه‌ر ته‌قه لێكر و د جهدا شه‌هید كر، هه‌ر د بنگه‌هێ پۆلیسان ڤه (سه‌برى حامد) ژى شه‌هید بوو، ل ئالیێ خوارێ د بن جادا به‌رانبه‌رى بنگه‌هێ به‌عسیان و ل سه‌ر بانه‌كى (ته‌ته‌ر حه‌بیب) شه‌ره‌كى دژوار دژى دژمنی دكر، لێ گولێن ژ ئالیێن ره‌فیقان ڤه دهاتن ئه‌و ژى شه‌هید كر و ب چه‌ند متره‌كان ژ وى وێڤه‌تر، گه‌نجه‌كى دى یێ خوینگه‌رم ب ناڤێ (جه‌میل محه‌مه‌د سه‌رحان) ئه‌و ژى شه‌هید بوو، ل سه‌ر جادا سه‌ره‌كیا نیڤا باژێرى ده‌مێ سه‌رهلداى ژۆردا دهاتن به‌ر ب باره‌گه‌هێ (ره‌فیق)ێن به‌عسیان ڤه (حه‌جى یه‌حیا خه‌مۆ) و (محه‌مه‌د یوسف) ئه‌و هه‌ردو ژى ل وێ ناڤێ شه‌هید كه‌تن. پشتى كه‌تنا ڤان شه‌هیدێن قه‌هره‌مان و لاوازیا چه‌كى و نه‌بوونا هاریكاریێ، چه‌نده‌كێ ره‌وش ئالۆز بوو و سه‌رهلدایێن ژ مسیریكى هاتین كۆمبوون و خوه دانه هه‌ڤ، هه‌تا بوویه دانێ ئێڤارى و (حازم حاجى ئاغا) ده‌بابه‌ك ب ده‌ست خوه خستی و بریه سه‌رێ گرێ سێمێلێ و ژ وێرێ گولله به‌رداینه باره‌گه‌هێ به‌عسیان و ب سه‌رئێكدا ئینایه خوارێ، ب ڤى ئاوایی جاره‌كا دى روح ب جانێ سه‌رهلدایان دا هاته خوارێ و رێزێن خوه دانه هه‌ڤ و هیڤیا ئازادیێ جاردى د دلێ واندا گه‌شبووڤه.
شه‌ر به‌رده‌وام بوو هه‌تا بوویه شه‌ڤ، به‌رهنگاریا ژ باره‌گه‌هى ره‌فیقان دهات هه‌ر دژوار ما، هه‌مى سه‌رهلداى ل تاخێ كۆچه‌ران كۆمبوون و چه‌ند جه ل دۆرێن باره‌گه‌هێ به‌عسیان هاتنه ده‌ستنیشان كرن كو دڤێت زێره‌ڤانیه‌كا باش لێ بێته‌گرتن، هه‌تا كو دبته سحار، ب ڤى ئاوایی كار هاتنه به‌لاڤكرن و هه‌ر ئێك چوو جهێ خوه، (هنده‌ك هه‌ڤالان ڤیا ب شه‌ڤێ هێرشی باره‌گه‌هى بكن، لێ ژ به‌ر تاریاتیێ و نه‌زانینا هێزا دژمنى باره‌گه‌هى ڤه پاشخستنه رۆژا دى).
ل سپێدێ گۆتن هێرشه و ژ چه‌ند ئالیان ڤه خه‌لك چوونه د باره‌گه‌هێ به‌عسیان ڤه، به‌لێ ده‌مێ چووینه ژوور كه‌س نه‌مابوو، هه‌مى ره‌فیق دره‌نگى شه‌ڤێ ره‌ڤى بوون و خوه خلاس كربوون، ب تنێ ته‌رمێ ره‌فیقه‌كى عه‌ره‌ب ل وێرێ مابوو.
ل گه‌ل هلاتنا تیرۆژكێن رۆژا 15/3/1991 باژێرێ سێمێلێ ب خوینا گه‌شا شه‌ش شه‌هیدێن قه‌هره‌مان و چه‌ند برینداران، ژ داگیركه‌ران ب تمامى هاته رزگاركرن و به‌رپه‌ره‌ك نوو ل به‌ر خه‌لكێ ده‌ڤه‌را مه ڤه‌بوو.
