ماددەیێ 140 بەرهەمێ ئیرادە و بەرخۆدانا گەنج و لاوێن مەیە و ب داوی نەهاتیە
نادر خەمۆ
گەلۆ چما هندەك کەس و لایەن د داخۆیانییێن خۆ یێن ڤالا دا و بێ بەرپرسیارانە؛ دبێژن ئێدی ماددێ ١٤٠ێ دەستووری ب دوماهی هات! هەلبەت ئەڤ چەندە ژی جهێ بەرپڕسیارێیە و شاشیەك ستراتیژی و مەزنە و بەرپڕسیاریەتەکا مێژوویی یە، بێگومان ب تنێ ئەو لایەن نوونەراتیا خۆ دکەن و نابنە نوونەرێن کوردستانی یێن خوەدی ئیرادە و خۆڕاگر و بەرخۆدای ل دەڤەرێن کوردنشین ل دەرڤەی ئیدارا هەرێما کوردستانێ ـ کوردستانیەتا شنگالا بریندار وەك نموونە. چنکو ماددەکێ دەستووری هەمیشەیی یە، خۆشبەختانە ل پڕۆسەیا هەلبژارتنێن وی دەستووری ل ١٥/١٠/ ٢٠٠٥ێ ڕێژەیا پتری ٨٠٪ ژ خەلکێ سەرانسەری ئیراقێ، دەنگ ل سەر داینە و پەسەندکرینە و پەیوەندی ب چارەنڤیسێ ٥٠٪ ژ کوردستانیێن دەڤەرێن ماددێ ١٤٠ ل دەرڤەی ئیدارا هەرێما کوردستانێ هەنە و هێشتا ماددەکێ کاڕایە و چالاكە و ئێکلانەبوویە، ژ بەر هندێ ب پشتراستی ڤە، دبێژم سەرکردایەتیا سیاسی یا کوردستانی ب هیچ شێوەکی دەلیڤێ نادەت و تەنازولێ ژ وی مادەی ناکەنت.
ماددێ ١٤٠ێ دەستوری بەرهەمێ ئیرادە و بەرخۆدان و قوربانیدانا ب هزاران گەنج و لاوێن کوردستانێ یە ل شۆڕەشێن ئیلۆن و گولان و سەرهلدانێ و هەژی گۆتنێ یە ل سەر دەمێ شۆڕشا مەزنا ئیلۆنێ، ب ڕابەرایەتی و سەرکردایەتیا بارزانیێ نەمر؛ ١٤ سالان ڤەکێشا مەزنترین و بەرفرەهترین شۆڕشا نەتەوەیی و نیشتمانی بوو د مێژوویا بزاڤا ئازادیخوازا گەلێ کوردستانێ دا، د ئەنجام دا ڕێککەفتنا ١١ی ئادارا ١٩٧٠، بەرهەمئینا و مەزنترین دەستکەفتیێ گەلێ کورد بوو ل وی سەردەمی، هەر وەسا ل چارچووڤەیێ ویستگەهێن گفتوگۆیان دا، سەرکردایەتیا شۆڕشا ئیلۆنێ ل گەل تاکڕەویا دەستهەلاتدارێن فاشست یێن بەغدایێ، قەت تەنازول ژ کوردستانیەتا کەرکووکا بابا گوڕگوڕ و دەڤەرێن کوردنشین، هەر ژ خانقین یا بەرخۆدای و شنگالا بریندار نەکرینە و هەتا قووناغا ئەڤرۆ ژی درژدن ل سەر بەرگریکرن و پاراستنا کوردستانیەتا وان دەڤەران. لەوما ب دیتنا من هەر لڤینەك یان گوهۆڕینەك ل دەستوورێ ئیراقا فیدرال بێتەکرن و ماددەیێن پەیوەندی ب قەوارەیێ هەرێمێ ڤە هەیین، بهێنە لادان، بێگومان دێ ل پاشەرۆژێ، بیتە هەرەشە و مەترسی ل سەر ئاسایش و سەقامگیریا ئیراقێ و دێ بیتە ئەگەرێ خولقاندنا قەیرانێن ئالۆزتر د ناڤبەرا هێزێن سیاسیێن ئیراقی دا؛ میحوەرێن (شیعی، سوننی، کوردی و دێ ململانێ و ناکۆکی بنە هەرەشە ل سەر پڕۆسەیا سیاسی یا ئیراقی و هینگی دێ سوبەهییا سەروەریا نیشتمانی یا ئیراقێ کەڤیتە د مەترسیەكا ڕاستەقینە دا.