مافێ مرۆڤی چاڤدێریا شاسوار عەبدولواحدی دکەت
ھەولێر، قائید میرۆ:
بەرپرسەکا دەستەیا مافێ مرۆڤی ئاشکرا کر، مافێ مرۆڤی ب ھووری چاڤدێریا رەوشا شاسوار عەبدولواحد و ھەموو کەسێن ب تۆمەتێن جودا د ناڤا ڤەلڤینا نەوەی نوێ دا ھاتینە دەستەسەرکرن دکەت و دبێژیت: شاسواری سکالا ل سەر ئاسایش و پارێزگارێ سلێمانیێ تۆمارکریە.
تاڤگە عومەر، رێڤەبەرا گشتیا مافێ مرۆڤی بۆ ئەڤرۆ نیوز دیار کر، سێ پارێزەرێن شاسوار عەبدولواحد سکالایەک ل دۆر ب سیاسیکرنا بادەکا شاسوار عەبدولواحدی تۆمارکریە، بەلێ ژ بەرکو بڕیارا دادگەھێ بۆ دەستەسەرکرنا شاسواری ھەیە، وان سکالا بلندکریە بۆ داخوازکارێ گشتی، چونکو ھەکە بابەتێ قانوونێ تێدابیت دەستەیا گشتیا مافێ مرۆڤی راستەوخوە نەشێت دەستێوەردانێ بکەت و گۆت: “مە ئەڤ داخوازیە ھنارتیە داخوازکارێ گشتیێ ھەرێما کوردستانێ ب مەرەما ڤەکۆلینێ و سکالا ژی ل سەر ئاسایشا سلێمانیێ و پارێزگارێ سلێمانیێ تۆمارکریە”.
تاڤگە عومەر گۆتژی: “تیمێن مافێ مرۆڤی سەرەدانا سەرۆکێ ڤەلڤینا نەوەی نوێ د ناڤا زیندانێ دا کریە دگەل ھەڤالێن وی یێن ھاتینە دەستەسەرکرن، تیمێن مە راپۆرتەک بۆ دەستەیێ بلندکریە، ل درۆ رەوشا شاسوار عەبدولواحدی، رۆژا دوشەمبی رۆنشتنا ئێکێ یا دادگەھکرنا شاسوار عەبدولواحد ب ڕێڤەچوو و تێدا دادوەری ھەردو لایەن ھەمبەر ئێککرن”.
