مالکی بزاڤا دروستکرنا ھێزەکا چەکدار ل کوردستانێ دکەت
ئەڤرۆ نیوز:
ئەندامەکێ لژنا ئاسایش و بەرگریێ ل جڤاتا نوونەرێن عیراقێ ئاشکراکر کو بزاڤێن سەرۆک وەزیرێن عیراقێ یێ بەرێ د بەردەوامن بۆ دروستکرنا ھێزەکا چەکداری ل ھەرێما کوردستانێ.
شاخەوان عەبدوللا بریاردەرێ لژنا ئاسایش و بەرگریێ ل جڤاتا نوونەران ژ فراکسیۆنا پارتی دیموکراتی کوردستان بۆ باسنیۆز، گوت” نوری مالکی سەرۆک وەزیرێن عیراقێ یێ بەرێ، کار بۆ وێ چەندێ دکەت کو ل کوردستانێ دەلیڤەک بۆ پەیدا ببیت ھەتاکو ھێزەکا چەکداری دروست بکەت و نوکە ژی مالکی د بزاڤێن خوەدا یێ بەردەوامە و دڤێت وان کەسان بۆ لایێ خوە ڕابکێشیت یێن کو دژی پێشمەرگەی و حوکمەتا ھەرێما کوردستانێ بن”.
شاخەوانی داخواز ژ پارتیا کارکەرێن کوردستانێ (پەکەکە) کر کو د وێ چەندێ بگەھیت کو حوکمەتا عیراقێ د دەمەکی دا ھاریکاریێ وێ دکەت و ئەو پشکەک نینن ژ سیستەمێ بەرگریێ عیراقی” زێدەتر گوت” ھەکە بۆ تێکدانا ناڤمالا کوردی نینە، بۆچی ھاریکاریا پێشمەرگەی ناکەت کو راستەوخوە سەر ب سیستەمێ بەرگریێ عیراقێ یە، ئیران و عیراق دخوازن ڤێ ناڤمالێ ب شێوینن، ھەڤدەم پێدڤیە پەکەکە بێژیتە پێشمەرگەی، تە چ پێدڤیە دێ ھاریکاریا تەکەم، نەکو ب عیراقەکا خوینمێژ کو ئەڤە چەندین سالە خوینا کوردان دمێژیت”.
ڤی پەرلەمانتارێ فراکسیۆنا پارتی دیموکراتی کوردستان، بیرا پەکەکێ ئینا کو دەمێ ھێرش ل سەر کۆبانی ھاتیە کرن، حوکمەتا عیراقێ ھێزا لەشکری بۆ کۆبانی نەھنارت، بەلکو ھەرێما کوردستانێ، پێشمەرگە بۆ ئازادکرنا وی باژێرێ کوردستانی ھنارت”.
شاخەوانی ل دووماھیێ گوت” پێدڤیە پەکەکە دەست ژ داردەستیا خەلکی بینیت و ناڤمالا خوە بپارێزن، حوکمەتا عیراقێ بەری نوکە ژی ھاریکاریا پەکەکێ یا کری، ئەوژی نە ژ بەر خاترا وانە، بەلکو ژبەر درێژکرنا قەلەم رەویا شیعی یە ل دەڤەرێ”.