مامۆستايه‌كێ زانكۆيا دهۆك خوه بۆ پۆستێ سه‌رۆك كۆماريێ به‌ربژار كر
ئه‌ڤرۆ نيوز:
ئه‌و كوردێ فه‌يلى يێ خوه بۆ پۆستێ سه‌رۆك كۆمارێ عيراقێ به‌ربژێر كرى راگه‌هاند كو ژ لايێ چو پارته‌كا كوردستانى و عيراقێ ڤه ناهێته پشته‌ڤانيكرن، به‌لێ وه‌كو ئه‌و ب خوه دبێژيت كوردێن فه‌يلى دێ پشته‌ڤانيێ لێ كه‌ن.
پرۆفيسۆر د. كه‌مال عه‌زيز قه‌يتولى، مامۆستايێ كوليژا نوشدار ل زانكۆيا دهۆك رۆژا پێنجشه‌مبى ل به‌غدا خوه بۆ پۆستێ سه‌رۆك كۆماريێ به‌ربژێر كريه و سيڤيێ خوه پێشكێشكى لژنا قانوونى كريه.
كه‌مال عه‌زيز فه‌يتولى راگه‌هاند كو په‌يوه‌نديا وى ل گه‌ل پارت و كه‌ساتيێن كوردستان و عيراقێ يا باشه، خوه ژ هه‌ژى پۆستێ سه‌رۆك كۆمارێ عيراقێ ژى دزانيت و گۆت: “دڤێت سه‌رۆك كۆمار كه‌سه‌كێ سه‌ربه‌خۆ بيت و شاره‌زا د سياسه‌تا نێڤده‌وله‌تى و دبلۆماسى دا هه‌بيت و ئه‌ڤ شيانه يێ ل ده‌ف من هه‌ين”.
زێده‌تر دبێژيت: “به‌رى سيڤيێ خوه پێشكێش بكه‌م، من بزاڤ كر هه‌ماهه‌نگيێ ل گه‌ل پارتێن كوردستانێ بكه‌م و من نامه بۆ پارتى ديموكراتى كوردستان و چه‌ند لايه‌نێن دى هنارت، به‌لێ به‌رسڤا ناما من نه‌هاتيه دان و نوكه ژى ب تنێ كوردێن فه‌يلى پشته‌ڤانيا من دكه‌ن”.
د. كه‌مال عه‌زيز ل سالا 1954ێ ل به‌غدا ژ دايكبوويه و ماسته‌ر و دكتورا د كيميا نوشدارى دا ل بريتانيا ب ده‌ست ڤه ئينايه، به‌رى سالا 2009ێ بۆ ماوێ چار سالان نوونه‌رێ حوكمه‌تا هه‌رێمێ بوويه ل رۆژهه‌لاتێ ئاسيا.
ده‌رباره‌يى ئارمانجێن خوه ژى، د. كه‌مال عه‌زيز دبێژيت: “من هه‌رده‌م بزاڤ كريه خزمه‌تا گه‌لێ خوه بكه‌م، ل سالا 1991ێ من ئه‌و نه‌هامه‌تيه ديت يا ب سه‌رێ كوردان هاتى، ئه‌ز ئه‌و كه‌س بووم يێ من بزاڤ كرى ده‌ڤه‌ره‌كا دژى فرينێ و ده‌ڤه‌ره‌كا ئارام بۆ باشوورێ كوردستانێ بهێته دروستكرن، ئه‌ڤه ژى كاره‌كێ باش بوو. نوكه ژى من دڤێت ب رێيا وى پۆستى خزمه‌تا هه‌موو گه‌لێ عيراقێ ب كورد و هه‌موو پێكهاتێن وێ ڤه بكه‌م.
