مامۆستایێن وانەبێژ دخوازن دەرمالەیێن وان زوو بھێنە مەزاختن
ئەڤرۆ:
مامۆستایێن وانەبێژ گازندان ژ ھندێ دکەن کو دەرمالەیێن وان زوو ژلایێ وەزارەتا پەروەردێ ڤە ناھێنە مەزاختن و گەلەک گیرۆ دبن، چونکی گەلەک ژ وان ب ھیڤیا وان دەرمالەیان ڤەنە و چو داھاتیێن دی نینن کو بۆ خوە ب مەزێخن و ڤێ چەندێ کارتێکرنەکا نەرێنی ل سەر ژیانا وان کریە و ئەڤە پێنج ھەیڤە وان دەرمالە وەرنەگرتینە.
مامۆستایێن وانەبێژ ماندیبوونەکا زۆر دبینن
سەربەست تاھا سەلام مامۆستایەکە دبێژیت: سالانە دەرمالێن وانەبێژان دھێنە گیرۆکرن، لێ ئەڤ سالە گەلەک ھاتنە گیرۆکرن و ئەڤە ماوێ پێنج ھەیڤانە دەرمالە بۆ وان نەھاتینە دان و ڤێ چەندێ کارتێکرنەکا نەرێنی ل سەر رەوشا وان مامۆستایێن وانەبێژ کریە، ھەروەسا کارگێریێن قوتابخانان ھەست ب کێماسیێ دکەن بەرامبەر گیرۆبوونا دەرمالێن وان وانە بێژان و گۆت: لەورا مامۆستایێن وانەبێژ ماندیبوونەکا زۆر دبینن خزمەتا قوتابیان دکەن و ناھێلن وانەیێن وان ژێ بچن، لێ کەمتەر خەمی بەرامبەر وان دھێتە کرن، ژلایێ جھێن شولەژێ ڤە،لەورا دخوازین چارەیەک بۆ ڤێ دیاردێ بھێتە دیتن و ھەر چو نەبیت دەمێ مووچێ مامۆستایان دھێتە دان ، دەرمالەیێن وانەبێژان ژی ل گەل بھێنە دان.
ناڤھاتی خویاکر ژی: چونکی گەلەک ژ وانەبێژان ب ھیڤیا وان دەرمالەیان ڤەنە و چو داھاتیێن دی نینن بۆ خوە ب مەزێخن و گیرۆبوونا دەرمالەیێن وان ئەو ئێخستینە د رەوشەکا بەرتەنگا ژیانێ دا.
داھاتیێ مە یێ ھەیڤانە ب تنێ ئەو دەرمالەنە
حسێن عارف وانەبێژەکە دبێژیت: ئەڤە ژ ھەیڤا ١٢ وەرە ل سالا بۆری ھەتا نوکە مە دەرمالە وەرنەگرتین و ب تنێ داھاتیێ مە یێ ھەیڤانە ئەو دەرمالەنە، لەورا گیرۆکرنا وان دەرمالان رەوشا مە یا دارایی نەباش بوویە و ب زۆری مرۆڤ دقەتینیت، ھەروەسا گەلەک مامۆستایێن وانەبێژ ھەنە خودان خێزانن و ب تنێ ب ھیڤیا وی دەرمالەی ڤەنە و ئەڤە پێنج ھەیڤە وان دەرمالە وەرنەگرتین و ڤێ چەندێ راستەوخوە کارتێکرن ل سەر رەوشاوان یا دارایی کریە و دیارکر ژی: چونکی وانەبێژێن ل دووری باژێران دەوامێ دکەن و پتریا روژێ دەمێ خوە ب وانەگۆتنێ ڤە دبورینن و نەشێن چو کارێن دی بۆ خوە دبەر را بکەن، لەورا ئەم دخوازین دەرمالەیێن مە ل گەل مووچێ ماموستایان بھێنە مەزاختن، ناڤھاتی ئەو چەندە ژی دیارکر: وانەبێژ داخواز دکەن کو ھەیڤانە نە ل دووف وی خشتێ کو کارگێریا قوتابخانێ بۆ داناین دەرمالە بۆ بھێنە مەزاختن، چونکی ھندەک ھەیڤ ھەنە گەلەک بھێنڤەدان تێدا ھەنە و ئەو رۆژێن بھێنڤەدانان بوومە ناھێنە مەزاختن و ب ڤی رەنگی خزمەت و ماندیبوونا مە ناھێتە ھژمارتن و زیان دگەھیتە مە، لەورا دخوازین جھێن شولەژێ خەمەکی ژ ڤی بابەتی بخون و چاڤ خشاندنەکێ لێ بکەن، کو خزمەتا مامۆستایێن وانەبێژ بکەن، چونکی ئەم ب دەوامێ ڤە ھاتینە گرێدان و خزمەتا قوتابیان دکەین و دڤێت ھاریکاریا مە بەرامبەر ڤێ خزمەتێ بھێتە کرن.
دێ بزاڤێ دکەین زوو بۆ بھێنە مەزاختن
ل دۆر ڤی بابەتی (ناسر محەمەد سەعید) رێڤەبەرێ پەروەردا قەزا ئامێدیێ بۆ ئەڤرۆ گۆت: پێدڤیە ل دووماھیا ھەر ھەیڤەکێ خشتێ وانەگۆتنا مامۆستایێن وانەبێژ ل وان قوتابخانان یێن ئەو وانەیان لێ دبێژن بھێتە بەرھەڤکرن و پاشی بۆ پەروەردێ بھێتە رەوانەکرن و پاشی ئەو خشتە دێ ھێتە ھووربینکرن، دووفدا دێ ھێتە رەوانەکرن بۆ خزینێ ژبۆ مەزاختنا دەرمالەیێن وان و گوت ژی: زۆر جاران کارگێریێن قوتابخانان وان لیستەیان زوو نا گەھیننە پەروەردێ و رێڤەبەرێن ھندەک قوتابخانان کەمتەرخەمیێ دکەن و ھەر چەندە مە چەندین جاران ل سەر ڤێ چەندێ ھایدار کرینە کو وان خشتەیان زوو بگەھیننە مە، ژبەرکو ھەردەمێ ئەو خشتە زوو گەھشتنە مە ئەم ژی دێ زوو دەرمالەیێن وان بۆ ھنێرین و ژبەر ڤان ئەگەران دەرمالەیێن وان گیرۆ دبن، ل ێ ئەم بزاڤێ دکەین کو ھەردەم دەرمالەیێن وان زوو بۆ بھێنە مەزاختن.
