مامۆستایەکێ زانکۆیێ: عادل عەبدولمەھدی یێ سەرکەفتی نابیت
ئه‌ڤرۆ نيوز:
چەند رۆژەکە سەرۆک وەزیرێن نوو یێ عێراقێ دەست بکاربوویە و مامۆستایەکێ زانکۆیێ ژی ئاشکراکر، عادل عەبدولمەھدی نەشێت بەرھنگاری حوکمەتا مەزھەبیا عێراقێ ببیت و کەسەکە جودا ھزر ل دەستھەلاتێ دکەت ھەروەسا دیارکر، سەرۆک وەزیرێن عێراقێ باوەری ب فیدڕالی و پێکڤەژیانێ ھەیە.
ھەلمەت غەریب، مامۆستایێ زانکۆیێ و چاڤدێرێ سیاسی بۆ رۆژناما ئەڤرۆ گۆت” بەرھنگاربوونا حوکمەتا مەزھەبی ل عێراقێ زۆر یا ب زەحمەتە، کو نوکە عادل عەبدولمەھدی دخوازیت بەرھنگاری ئەڤێ حوکمەتا مەزھەبی ببیت، بدیتنامن عادل عەبدولمەھدی یێ شەنسێ خوە تاقی دکەت و ھێشتا دیارنینە دێ سەرکەڤیت یانژی نە، ئەز باوەرناکەم سەرۆک وەزیرێ نوو بشێت بسەر ئەڤان ھەموو ئاریشەیێن عێراقێ دا باز بدەت، چونکە پشتی پڕۆسا ئازادیا عێراقێ چەندین ئاریشا عێراق ڤەگرتیە و کەسەکێ وەک عادل عەبدولمەھدی زەلامەکێ بێ پشت و پەنایە، چو ھێزێن میلیشیاتێن سەربازی لپشت نینە و لپەرلەمانی چو کۆتلە پشتەڤانیێ ل سەرۆک وەزیرێ نوکە ناکەن، لەوڕا ھەر پڕۆژەیەک بھێتە پێکەشکرن و زیان بۆ ئەڤان ھێزێن توندڕەوێن مەزھەبی ھەبیت دێ ئاستەنگان بۆ سەرۆک وەزیرێن عێراقێ چێکەن و رێکێ نادەن پڕۆژەیێن نافھاتی سەربگرن.
ئەڤی مامۆستایێ زانکۆیێ گۆتژی” سەرۆک وەزیرێن عێراقێ کەسەکێ میانڕەوە و باوەری بسەروەریا عێراقێ ھەیە و کەسەکێ جودایە ل سەرکردەیێن دی یێن عێراقێ کو ب مەزھەبی کار دکەن، راستە عادل عەبدولمەھدی کەسەکە باوەری ب فیدڕالی و پێکڤەژیانا پێکھاتێن عێراقێ ھەیە و سەرچاڤەکێ جوانە بۆ دەستھەلاتا عێراقێ، لێ سەرۆچاڤێن جوان لناڤا ئەڤی ژینگەھێ پیس یێ عێراقێ دشێت سەرکەفتی یان نەخێر، ھەتا پەیوەندیێن عادل عەبدولمەھدی دگەل کوردان زۆر بھێزن، بەس نەشێت لسەر حیسابا شارعێ عەرەبی ئاریشەیێن دگەل ھەرێما کوردستانێ چارەسەربکەت، یانژی تشتەکی بکەت بۆ چارەسەرکرنا پرسێن ھەلاویستی دناڤبەرا ھەرێم و بەغدا کو د بەرژەوەندیا کورداندابیت.
ل دۆر پێگەھێ کوردان ل بەغدا ھەلمەت غەریب دیارکر”پێگەھێ ھەرێما کوردستانێ ڤێجارێ وەک بەرێ یێ بھێز نابیت، ئەڤێ چەندێ ژی پەیوەندی ب ئەڤێ جوداھیا بۆچوونێن لایەنێن سیاسی یێن ھەرێما کوردستانێ و پەرتەوازیی و لێک قوتبوونا کوردانڤە ھەیە، بێگومان دەمێ کورد ئێکگرتی نەبن بەغداژی چو خەم نابن بۆ ھەرێما کوردستانێ، لەوڕا پێدڤیە کورد ئێکگرتی ل بەغدا و ئێک پڕۆژە و بەرنامە ھەبیت، بەرۆڤاژی بڤی شێوەیێ نوکە دێ زیانێن مەزن بۆ ھەرێما کوردستانێ ھەبن.
