مامۆستا ئیمزا بۆ بھێنڤەدانا رۆژا شەمبی کۆم دکەن
ئەڤرۆ نیوز، سالار دۆسكى:
ب مەرەما رازیبوونا حوکمەتێ ل سه‌ر بهێنڤه‌دانا رۆژێن شه‌مبى بۆ هه‌موو سازيێن سه‌ر ب وەزارەتا پەروەردێ ڤه، رێکخراوا دەنگێ مامۆستايان ل سەرانسەری ھەرێما کوردستانێ دەست ب کۆمکرنا ئیمزا کر.
بەدەل بەرواری جێگرێ رێکخراوا دەنگێ مامۆستايان بۆ ئەڤرۆ نیوز ئاشکرا کر کو رازیبوون ژ رێڤەبەریا گشتی یا پەروەردا دھۆک وەرگرتینە و دێ ب نڤیسار ھەموو پەروەردێن قەزا ھێنە ئاگەھدارکرن کو ھەر مامۆستایێ دڤێت رۆژا شەمبی بیتە بھێنڤەدان دشێت ئیمزا بکەت.
بەرواری ھێشتا ژی گۆت: ئەگەر دایک و بابێن قوتابیان ل وەزارەتێ رۆژا شەمبی بھێنڤەدان ھەبیت، دبینم ئەوان چ بێھنڤەدان نینە چونکە دێ ھەر رۆژا شەمبى بۆ زارۆیێن خوە ژ خەو رابن و ئەڤجا ئەگەر شەمبی بۆ کرە بھێنڤەدان دێ باشتر بیت، دیسان گەلەک قوتابخانێن ئەھلی و نموونەی و یێن تایبەت بھێنڤەدان ھەیە، دیسان کوچکێن پەروەردا شەمبيێ بھێنڤەدانە و دڤێت جوداھی نەمینت”.
دا زانين ژى كو دێ رازیبوون ژ ھەموو پەروەردێن ھەرێمێ ھێتە وەرگرتن و دێ فورم ھێنە بەلاڤەکرن و مامۆستایێن ڤێن دێ ئیمزا کەن و دێ ئیمزا ھێنە کۆمکرن و دێ روونشتن ل گەل کەسانێن تایبەتمەند و خودان ئه‌زموون و شارەزا ھێنەکرن و دێ باشی و خرابی ھێنە دیارکرن و دێ بۆ پەرلەمان و حوکمەت و وەزارەتا پەروەردێ ھێنە بلندکرن.
بەرواری ئاشکرا کر کو چارەسەری بۆ ھەموو گرفتان دیتی نە و دو دەوامی و سێ دەوامی نابیتە رێگر ھەمبەر وێ چه‌ندێ كو رۆژا شەمبی بیتە بھێنڤەدان.
