مامەلێن زیندانیێن سیاسی ھاتینە راگرتن
ئەڤرۆ نیوز:
زیندانیێن سیاسی ل پارێزگەھا دھۆکێ گلەیێ ژ حوکمەتا ھەرێما کوردستانێ دکەن و دبێژن ماوەکێ درێژە مە مامەلێن خوە برێڤەبرین دا کو وەک زیندانیێن سیاسی بھێینە ھژمارتن، لێ چو دیار نینە. بەرپرسێ کۆمەلا زیندانیێن سیاسی ل دھۆکێ ژی دبێژیت ھەموو دوسەیێن زیندانیێن سیاسی بۆ جھێن پەیوەندیدار ھاتینە رەوانەکرن، لێ قەیرانا دارایی ئاستەنگ بوویە کو مۆچە نەھاتینە دابینکرن کو ھژمارا وان نێزیکی ھزار زیندانیێن سیاسی نە. موردار دەرویش، وەک زیندانیەکێ سیاسی دبێژیت: ئەڤە پتر ژ چار سالانە مە مامەلێن خوە ل کۆمەلا زیندانیێن سیاسی برێڤەبرین و ھێشتا چو دیار نینە و گۆت: د ڤی ماوەی دا مە چەندین جاران مامەلە دووبارە یێن چێکرین و بێی تشتەک پێڤە بھێت. زێدەتر گۆت: د ماوێ زیندانکرنێ دا ل سەر دەمێ رژێما گۆربەگۆر مە گەلەک نەخۆشی و ئەشکەنجەدان یێن دیتین و گرتنا مە ژی ژبەر مادێ سیاسی بوە، پشتی ڤان نەخۆشیان نوکە مافێ مە یێ دھێتە بەرزەکرن و کەس پرسیارا رەوشا مە ناکەت، پشتی مامەلە ژی ژ مە وەرگرتین و گۆتن دڤێت بھێنە ھەولێرێ و لیژنەیەک ل وێرێ دروونیت و ئەم ماینە ل ژڤانێ کا کەنگی دێ بێژنە مە وەرن و ئەڤە چار سالا دەربازبوون ھێشتا یێ گازی مە دکەن. ئەو چەند ژی دیار کر، نھا بۆ وان ناسنامێن زیندانیێن سیاسی ژی ھاتینە چێکرن، لێ مۆچە بۆ دەرنەکەفتینە و ل وی ماوەیێ ئەم ھاتینە گرتن گەلەک کارتێکرن ل مە بۆ و ژ ھەموو لایان ڤە و نەشیان خواندنا خوە ژی تەمام بکەین و چو بۆ نەھاتیەکرن، ئەم داخوازێ ژ حوکمەتا ھەرێما کوردستانێ دکەین و گرنگیێ ب بابەتێ زیندانیێن سیاسی بدەن، چونکو زیندانیێن سیاسی گەلەک کاودانێن نەخۆش و قوناغێن سەخت یێن بۆراندنین و پتریا وان نوکە د بێ مۆچە نە و پێدڤیە کارەکێ باش بۆ وان بھێتە کرن و نەخۆشیێن وان نەھێنە ژبیرکرن. بایز عەبدوللا وەک زیندانیەکێ سیاسی ل سەردەمێ رژێما بەعس گۆت: ئەز وەک زیندانیەکێ داخوازا مافێ خوە دکەم و پشتی بۆ ماوەکێ درێژ ل سەردەمێ رژێما بەعس ھاتینە گرتن و ئەشکەنجەدان و چەندین نەخۆشی ب سەرێ مە ھاتین و ھەتا نھا چو بۆ مە نەھاتیەکرن و دیار کر، ئەڤە دو سالە وان مامەلێن خوە ل کۆمارا زیندانیان و دەزگایێ شەھید و ئەنفال کریان برێڤەبرین و گۆت ژی: ھەر ئێک ژ مە ھژمارا مۆبایلا وی ژێ وەرگرت و ل سەر فۆرما مە تۆمارکر و گۆتن دێ گازی ھەوە کەین و ئەڤە ماوەکێ دریژ دەرباز بوو کەسێ ئاگەە مە نینە و ئەم یێن بێ زاربووین، چونکو نھا مۆچە بۆ گەلەک ھەڤالێن مە یێن ئەم ب پێکڤە ھاتینە گرتن بو دەرکەفتی یە و ھێشتا ھژمارەکا زور ژکەسێن وەکو مە ماینە و چو بۆ نەھاتیە کرن. کامل زێوەیی بەرپرسێ کۆمەلا زیندانیێن سیاسی ل دھۆکێ گۆت: دەربارەی بابەتێ زیندانیان نەخاسمە یێن ل ئەنفالا 1988 ئەوێن ل کەلھێن نزارکێ و سەلامیێ و کەلھێن دن ھاتینە گرتن و دەستەسەرکرن ھەموو مامەلێن ھاتینە برێڤەبرن و ب دووماھی ھاتینە و مە رەوانەی لیژنا یاسایی کرینە و ئەو لیژنە گازی زیندانیێن سیاسی دکەت و بۆ پشتراستکرنا دوسێن وان و دڤێت ھەر زیندانیەک دوو دیدەڤانان ل گەل ببەت دەمێ ژلایێ وێ لێژنێ ڤە دھێتە گازیکرن. کامل زیوەی گۆت ژی: پتر ژ ھزار مامەلان ب دووماھی ھاتینە و رازەمەندی ژی ل سەر ھاتیە کرن و بۆ ئەنجومەنێ وەزیران ھاتینە ھنارتن و گۆت ژی: نھا پتر ژ سەد کەسان ل پارێزگەھا دھوکێ مۆچەکێ 250 ھزار دیناری وەردگرن. کاملی ئەو چەند ژی دیار کر، بەری ماوەکی و ل دووڤ بریارەکا ئەنجومەنێ وەزیران کو ئێدی مامەلەیێن زیندانیێن سیاسی بھێنە راگرتن و نەھێنە برێڤەبرن و ژ بەر ھندێ نھا مامەلە ھاتینە راوەستاندن و گۆت: دێ ھەولدەین ل نێزیک جارەکا دی دەست ب رێڤەبرنا مامەلێن وان بھێتە کرن، چونکو ھێشتا گەلەک کەس ل پارێزگەھا دھۆکێ ماینە مامەلەیێن وان ب دوماھیک نەھاتینە. سەبارەت گیرووبوونا مامەلان ژی کامل زێوەی گۆت: ل دەستپێکێ ئێک لیژنە ب تنێ ھەبوو، ل ھەرێما کوردستانێ ئەو ژی ل ھەڤلێرێ بۆ پشتراستکرنا دوسەیێن زیندانیان و دوسەیێن زیندایێن سیاسی ل ھەموو پارێزگەھێن کوردستانێ ب تنێ ژ لایێ وێ لیژنێ ڤە دھاتنە برێڤەبرن، لەورا گیرودبون و گۆت: پشتی مە چەندین ھەولدانکرین لیژنەیەک ل پارێزگەھا دھوکێ ژێ ھاتە دانان و ئەڤە نێزیکی سالەکێ یە ئەڤ لیژنە یا کارێ خوە دکەت بۆ پشتراستکرنا دوسەیێن زیندانیان و ئەڤ لیژنە ھەر جار گازی ھندەک زیندانیان دکەت و ئەگەر نە ھەموو ئەو کەسێن مامەلەیێن خوە برێڤەبرین دێ ھێنە گازی کرن.
