مانا حەشدا شەعبی ل عیراقێ نەمانا دەولەتا عیراقێ یە
ئه‌ڤرۆ نيوز:
شارەزایەکێ ئێمناھیێ دیارکر، ئەڤرۆ عیراقێ چو پێدڤی ب ھەبوونا میلیشیاتێن حەشدا شەعبی نینە، و دڤێت نەمینن، لەوڕا پێدڤیە بۆ بدەستڤەئینانا پشتەڤانیا فەرە حوکمەتا عیراقێ چو ھێزێن میلیشیا نەھێلیت لدۆر لڤینێن گروپا تیرۆرستیا داعش دبێژیت، داعشێن عیراقی ماینە و ھەردێ بەردەوامبن لسەر چالاکیێن خوە، چونکە پتریا وان بەعسینە و دژی سیستەمێ نوکەیێ دەستھەلاتا عیراقێ نە.
ئازاد ئەبوبەکر، شارەزایێ ئێمناھیێ بۆ رۆژناما ئەڤرۆ گۆت: ھەموو لایەنێن عیراق داخوازکر بوو گروپێن حەشدا شەعبی ل دەڤەرێن مووسل بھێنە ڤەکێشان و بۆ رازیکرنا کورد و عەرەبێن سونی کو پشکداربن د حوکمەتا نوویا عیراقێ دا، بەلێ ھەلوەشاندنا فەرماندەیا ئۆپەڕاسیۆنێن نەینەوا رامانێن دیکە ھەنە، گڤاشتنێن زۆر ھەنە حەشدا شەعبی بھێتە ھەلوەشاندن و چو ھێزێن میلیشیا نەمینن، ئەف دەستھەلاتێن حەشدا شەعبی ھەی نامینن، ب تایبەتی عیراقێ ھێزێن فەرمی ھەنە وەک پۆلیس و لەشکر و دەزگەھێن ھەوالگەری، ئەڤرۆ عیراقێ چو پێدڤی ب ھەبوونا میلیشیاتێن حەشدا شەعبی نینە و دڤێت نەمینن، لەوڕا پێدڤیە بۆ بدەستڤەئینانا پشتەڤانیا فەرە حوکمەتا عیراقێ چو ھێزێن میلیشیا نەھێلیت، ھەکە دەستھەلات ددەستێ حەشدا شەعبی دابن وەک مە دیتی ئیدی نیشانا ھندێ یە چو دەولەتەک نینە بناڤێ عیراق، ئەگەرێن ڤەکێشان و کۆمکرنا حەشدا شەعبی زۆرن، بەلێ یا سەرەکی ئەڤە ھەموو گەھشتینە وێ باوەریێ حەشد نابیت بمینیت و مانا حەشدا شەعبی بخوە ئاریشەیەکە بۆ عیراقێ.
ل دۆر لڤینێن گرۆپا تیرۆرستیا داعش ئازاد ئەبوبەکری دیارکر” داعش ھەموو ئەو ھێز نەبو ل دەرڤەی عیراقێ ھاتبیت، بەلکو ھژمارەکا زۆرا چەکدارێن داعش خەلکێ عیراقێ بخوە بوون، بتایبەتی ئەڤێن بەرێ سەر ب رژێما بەعس بوونە و ھێشتا ماینە و ھەر لنافخۆیا عیراقێ ماینە و نەشێن بھێنە ناڤا پڕۆسا سیاسی و بچنە ناڤا دەزگەھێن ئەمنی و لەشکری، د ھەر دەمەکیدا دشێن شانەیێن خوە دروست بکەنەڤە و دەست ب چالاکیێن خوە بکەن، چونکی ئەو دژی ئەڤی سیستەمێ نوکەیێ عیراقێ نە و لھەر دەلیڤەیەکێ دا دشێن گورزەکێ ل ھێزێن عیراقی بدەن و بدیتنامن داعش ل عیراقێ دوماھی نەھاتیە و ھێشتا مایە، ھەگەر بناڤێ داعش نەمینن ئەڤە دێ لبن ناڤەکێ پەیدابنەڤە دوبارە، چونکە خەلکێ نەڕازی مایە ل عیراقێ بتایبەتی عەرەبێن سونە.
