ماوێ ده‌ستنيشانكرى يێ هنارتنا مووچێن هه‌رێمى ب دووماهى هات و چو ديار نينه
ئه‌ڤرۆ نيوز، نيوار محه‌مه‌د سه‌ليم:
ئه‌نداما جڤاتا نوونه‌رێن عيراقێ ل سه‌ر ليستا پارتى ديموكراتى كوردستان دياركر كو پێدڤى بوو د ماوێ وێ هه‌يڤێ دا كێشا هنارتنا مووچێن فه‌رمانبه‌ران هاتبا چاره‌كرن، به‌لێ هه‌ر وه‌كو خوه‌يه و نه‌دووره ئه‌و سێ هه‌يڤێن داناين كێشه چاره نه‌بن.
ئه‌نداما جڤاتا نوونه‌رێن عيراقێ ل سه‌ر ليستا پارتى ديموكراتى كوردستان، نه‌جيبا نه‌جيب، بۆ ئه‌ڤرۆ نيوز گۆت: “د به‌رنامێ كارێ حوكمه‌تا حه‌يده‌ر عه‌بادى دا هه‌يڤه‌ك بۆ هنارتنا مووچێن فه‌رمانبه‌رێن هه‌رێما كوردستانێ هاتبوو ده‌ستنيشانكرن كو وێ هه‌يڤێ دا وێ كێشێ چاره‌كه‌ت و مووچان ره‌وانه كه‌ت”.
زێده‌تر گۆت: “د ڤى ماوێ ده‌ستنيشانكرى دا ئه‌ڤ مووچه نه‌هات و نوكه بابه‌ت يێ گرێدايى داهاتێ په‌ترۆلا هه‌رێما كوردستانێ كرى، كو دخوازيت داهاتێ هه‌رێما كوردستانێ بچيته به‌غدا و ژ نوو ژ وێرێ به‌هرا هه‌رێما كوردستانێ ژێ بهێته دان، كوردستان ژى دخوازيت ئه‌و به‌هرا خوه ژێ هه‌لگريت و يا زێده بۆ عيراقێ ره‌وانه بكه‌ت، ژ به‌ر نه‌بوونا چو گرنتيان كو ئه‌و دێ وى پاره‌ى ب دروستى ره‌وانه‌ى هه‌رێمێ كه‌ن، چو جاران به‌هرا هه‌رێمێ ب دروستاهى نه‌هاتيه”.
ده‌رباره‌ى وێ چه‌ندێ كا دێ د ڤان دو هه‌يڤێن ماين دا كێشه چاره بن، ئه‌نداما جڤاتا نوونه‌رێن عيراقێ ل سه‌ر ليستا پارتى ديموكراتى كوردستان دا زانين كو گه‌له‌ك شاندێن چوونه به‌غدا، به‌لێ كێشه چاره نه‌كرينه و گۆت: “ڤێ جارێ ئه‌م د پشت راستين چونكو ب ئاماده‌بوونا ئه‌مريكا و نه‌ته‌وێن ئێكگرتى كوردان رێكه‌فتن يا ل گه‌ل عه‌بادى كرى كو پێدڤيه وان خالان ب جهـ بينيت”.
نه‌جيبا خانێ ئه‌و ئێك ژى نه‌ڤه‌شارت كو كاودانان ژى ژ هه‌موو لايه‌نان كارتێكرنا خوه ل سه‌ر عيراقێ و هه‌رێما كوردستانێ ژى كريه و گۆت: “چاره‌كرنا كێشا د ڤى ده‌مى دا جوداهيا خوه يا هه‌يى، به‌لێ وه‌لاتيێن هه‌رێما كوردستانێ پێدڤى ب مووچه‌ى هه‌يى و حوكمه‌تێ ژى ب بوودجێ هه‌يه ژ به‌ر كو دا هاريكاريا وان ئاواران بكه‌ت”.
ل دۆر وێ چه‌ندێ كا دبيت هه‌رێم ژبلى وان سێ هه‌يڤان هێشتا ده‌ليڤێ بده‌ته عه‌بادى، ئه‌نداما جڤاتا نوونه‌ران گۆت: “هه‌موو بۆچوون يێن هه‌ين، نوكه يا گرنگ بوودجا هه‌رێما كوردستانێ و گرێدانا مووچێ پێشمه‌رگه‌ى يه كو ئه‌و د سه‌ره‌كى نه چاره بوون، هه‌لبژارتنێن دى ل به‌ر هه‌ردو لا هه‌بن”.
دا زانين ژى كو هنده‌ك كێشه ژى يێن هه‌ين نه گرێداى وى ده‌مێ ده‌ستنيشانكرى نه بۆ نمۆنه ده‌ستنيشانكرنا ماددێ 140 بهێته كرن يان نه، دێ گرێدايى وان پێشنيازان بيت يێن دهێنه كرن، هه‌تا بهێته چاره‌كرن.
ئه‌ڤرۆ 8\10 هه‌يڤه‌ك ل سه‌ر دانا باوه‌ريێ ب حوكمه‌تا حه‌يده‌ر عه‌بادى سه‌رۆك وه‌زيرێ عيراقێ كو بڕيار بوو د ماوێ هه‌يڤه‌كێ دا كێشا مووچێ فه‌رمانبه‌رێن هه‌رێمێ چاره كه‌ت و د دو هه‌يڤێن دى دا، كێشێن دى يێن د ناڤبه‌را هه‌رێمێ و به‌غدا دا چاره كه‌ت.
