مایسترو دلشاد سەعید دکتورا د موزیکا کوردی دا وەرگرت
ئەڤرۆ نیۆز، تۆڤی:
هەلبەستڤان ئەدیب چەلکی دایە دیارکرن،کو ل رۆژا 20.11.2017 موزیکڤانێ ناسیارێ کورد و جیهانی مامۆستا دلشاد سەعید ل زانکۆیا موزارت ل باژێڕێ سالزبورگ ل وەلاتێ نەمسا گۆڤاناما دکتورایێ د موزیکا کوردی دا، ل سەر ناما خۆ یا ب ناڤنیشانێ (ڤەکۆلینەك لسەر موزیکا کرمانجی – زێدەتر بەرچاڤکرنا سترانێن رتمی) ب پلەیا گەلەك باش وەرگرت،هەروەسا بریارە ل دوماهیا سالا خواندنێ دا ل مەها خزیرانا 2018 ێ ئەڤ گۆڤانامە د ئاهەنگا تایبەتا دەرچوونێ دا بهێتەدان.
هەروەسا گوتیە،بێگومان ئەڤە ئێکەمین جارە ڤەکۆلینەکا هۆسا ئەکادیمی و گەلەك گرنگ و بەرفرەهـ لسەر موزیکا کوردی / کرمانجی د زانکۆیەکا ئورۆپی دا دهێتە ئەنجامدان،ل گەل هەڤبەرکرنا موزیکا کوردی دگەل یا جیرانێن کوردا و دەڤەرێ، گەلەك ڤاڤارتنێن جوان ل ناڤبەرا رەنگێن گۆڤەند و دیلانێن کوردی دا لسەر بنگەهێ رتما (رتما ئاوازێ) دڤێ ڤەکۆلینێ دا هاتینەکرن و تایبەتمەندی یێن موزیکا کرمانجی هاتینە دەسنشانکرن،مامۆستا دلشادی هندەك راستی یێن ڤەشارتی، دڤێ ڤەکۆلینێ دا ئاشکراکرینە و سەلماندی نە، کو دو ژێ ئەڤە نە: –
1- پرانیا موزیکا کرمانجی ب رەنگ و تایێن خۆ ڤە یا جودایە ژ موزیکا گەلێن رۆژهەلاتا ناڤین و دەڤەرا قەوقازێ، بەلکی کێمترین خالێن هەڤپشك هەنە دگەل موزیکا زاراڤێن دی یێن کوردی ژی.
2 . رتمەکا ئالۆزو غەریبا هەی ب ناڤێ (جورجینا) ل ناڤ کرمانجا و هندەك دەڤەرێن ل عیراقێ بکار دهێت، لێ پشتی دووڤچوونەکا باش، دیاربوو کو ئەڤە رتمەکا کرمانجی یە، ژبەر ڤان ئەگەران و گوت ژی:
ئێك : ل ناڤ کرمانجان ئەڤ رتمە گەلەکا بەلاڤە و گەلەک ژ مێژە دهێتە بکارئیینان، لێ ل هندەك دەڤەرێن عیراقێ ژ دەسپێکا سەدێ بیستێ هەتا ناڤەراستا وی بکارهاتیە و پشتی هنگی گەلەك کێم بکارهاتی یە.
دو : ل دەڤەرێن دی یێن عیراقێ، د سترانێن فولکلوری دا نەهاتیە بکارئینان، بەلکی تنێ د سترانێن نوی دا هاتیە بکارئینان. لێ ل ناڤ کرمانجان گەلەك بەربەلاڤە و ژمێژە د سترانێن فولکۆری دا هاتیە بکارئینان.
