محەمەد مەهدی دێ ل ڤی جهی دەرکەڤیت؟
ئەڤرو نیوز ، نەوزاد هلوری:
بابەتێ هاتنا محەمەد مەهدی ل کەنالێن راگەهاند و تورێن جڤاکی ل هەرێما کوردستانێ یێ گەرم بووی تایبەتی ل سنوورێ کارگێریا گەرمیان ، رێڤەبەریا ئەوقافێ ژی راگەهاند کو چوو راستی بو هاتنا وی نینە و ئەڤ یەک تنێ پروپاکندەیەکە ، هەکە بهێت ژی دێ ل ناڤ قورەیشان بیت نەک ل گەرمیان.
ل دوو روژێن بوری خێزانەک ل کارگێریا گەرمیان پروپاکندێ ب هاتنا محەمەد مەهدی دکەت و ل گورەی ئاحفتنێن ئەوێ خێزانێ محەمەد مەهدی دێ ل گەرمیان دەرکەڤیت.
ئەڤ یەک ژی بویە بابەتێ گەرمێ کەنالێن راگەهاندنێ و تورێن جڤاکی و ل هەند دەڤەران ژی ترس ل دەف خەلکی پەیدابوویە.
دڤی واریدا غەریب ئەحمەد رێڤەبەرێ ئەوقافا دەڤەرا راپەرین کو ب کارگێریا گەرمیان دهێتە نیاسین بو ئەڤرو نیوز گوت: ( ئەو بەحس و خەبەرێن بەحس ل هاتنا محەمەد مەهدی دکەن ب تایبەتی ژلایێ خێزانەکا دەڤەرا مە چوو راستی بو نینن ، بارودوخێ نهایێ کوردستان تێدا دبورین دەمێ ڤێ یەکێ نینە ، لەوران پێدڤی یە ئەو خێزان دەستان ژ ڤێ یەکێ بەردەن)
زێدەتر گۆت: ( ئەگەر ئەڤ یەک ژلایێ وان بەردەوام بیت و کەسەک سکالایێ ل وان تومار بکەت ، بێگومان دێ مە هەلویستێ خوە هەبیت و دوڤچونا بابەتی کەین)
ل گورەی دەقێن ئاینێ ئیسلامێ محەمەد مەهدی دێ ل دوماهیا دنیایێ هێت و کەسەکێ چاکە و دەرکەفتنا وی ژی دێ دناڤ قورەیشان بیت ، بەلێ خێزانا ناڤبری وەسا ددەتن دیارکرن کو محەمەد مەهدی دێ ل گەرمیان دەرکەڤیت.
