نڤیسارا پارێزگەهبوونا شنگالێ گەھشتە جڤاتا نەینەوا
ئه‌ڤرۆ نيوز:
سەرۆکێ کۆتلا برایەتی و پێکڤەژیانێ ل جڤاتا پارێزگەھا نەینەوا دیار کر کو ب نڤیسارەکا فەرمی جڤاتا قەزا شنگالێ داخواز بۆ پارێزگەهبوونا شنگالێ کرن و نوکە نڤیسارا گەھشتیە جڤاتا پارێزگەھا نەینەوا دا کو کار ل سەر بھێتە کرن و گۆت: “ھەکە ئەنجومەنێ وەزیران و پەرلەمانێ عیراقێ ل سەر داخوازا خەلکێ شنگالێ رازی نەبیت دێ راپرسی ھێتە کرن و خەلک دێ بڕیارا خوە دەن”.
سەیدۆ چەتۆ، سەرۆکێ کۆتلا برایەتی و پێکڤەژیانێ ل جڤاتا پارێزگەھا نەینەوا بۆ ئەڤرۆ دیار کر کو شنگال دێ بیتە پارێزگەھەک سەر ب ھەرێما کوردستانێ ڤە و ھەر دەڤەرەکا ببیتە پارێزگەە پێدڤیە داخوازی ژ جڤاتا وێ دەڤەرێ بگەھیتە جڤاتا پارێزگەھا نەینەوا بۆ وێ چەندێ گەنگەشە ل سەر بھێتە کرن و گۆت: “پێدڤیە نەخشە و ماستەر پلان و ھژمارا ئاکنجیان و گۆند و دەڤەرێن ب سەر ڤە و رووبەرێ ئەردی بۆ پارێزگەھبوونا ھەر دەڤەرەکا سەر ب نەینەوا ڤە بھێنە دانان”.
ناڤھاتی ئاماژە دا وێ چەندێ کو نوکە نڤیسارا جڤاتا قەزا شنگال بۆ پارێزگەە بوونا قەزا ناڤبری گەھشتیە و ھیشتا چوو نڤیسار بۆ پارێزگەە بوونا دەشتا نەینەواێ نە گەھشتینە ژ بەر ڤێ چەندێ پێدڤیە جڤاتێن قەزا و ناحیان ڤێ داخوازێ ژ جڤاتا نەینەواێ بکەن و گۆت: “نڤیسارا جڤاتا قەزا شنگال ب فەرمی یا گەھشتیە جڤاتا نەینەواێ و دێ ب فەرمی بۆ ئەنجومەنێ وەزیران ھێتە بلندکرن و ب رێیا ئەنجومەنێ وەزیران دێ بۆ پەرلەمانێ ھێتە رەوانەکرن و ل سەر داخوازا خەلکێ شنگال حەز دکەن شنگال ببیتە پارێزگەھەک سەر ب ھەرێما کوردستانێ ڤە و بۆ ڤێ مەرەمێ دێ راپرسیەک د ناڤ خەلکێ دەڤەرێ دا ھێتە کرن و خەلک دێ بڕیارێ ل سەر چارەنڤیسی خوە دەن”.
