مزگەفتەكا 900 سالی ل بامەرنێ دهێتە نـووژەنكرن
ئامێدیێ، مەحمود نهێلی:
دەست ب نوژەنكرنا مزگەفتا شوونواری یا كەڤنا گوندێ بامەرنێ ل دەڤەردارییا ئامێدیێ هاتیە كرن وەكو دەستپێكەك هەم ژ بۆ قورتالكرنا وێ ژناڤچوونێ و هەم ژی دێ بیتە هاندەرەك بۆ راكێشانا گەشتیاران بۆ وێ ناوچەداریێ.
د. ئیسماعیل بامەرنی دیار كر، ژ بەر كو ئەڤ مزگەفتە گەلەكا كەڤنار و جهەكێ شوونواری یە بەر ب ژناڤچوونێ دچوو و گۆت: «ژ بۆ پاراستنا وێ ژناڤچوونێ، هەروەسا راكێشانا گەشتیاران بۆ وێ ناوچەیێ، دەست ب نووژەنكرنا وێ هاتیە كرن و نوكە كارێ نووژەنكرنێ یێ بەردەوامە».
ناڤهاتی دیار ژی كر وان دڤێت نووژەنكرنا ڤێ مزگەفتا بەری 900 سالان هەر ل سەر شێوازێ وێ یێ بەرێ و ب بەرێن بازی و وەكو شێوێ وێ یێ كەڤنار بهێتە چێكرن و نووژەنكرن.
ئەڤ مزگەفتە د بەرێ دا ژ بلی جهەكێ ئایینی بوویە و ژ بۆ ئەنجامدانا نڤێژ و تاعەتی دهاتە بكار ئینان، قازی و موفتی ژی لێ هەبووینە و جهێ دانا فەتوا و بڕیارێن ئایینی بوویە، ژ بەر وێ یەكێ ژی نووژەنكرنا ڤێ مزگەفتێ ژ لایێ خەلكێ بامەرنێ ب گشتی و تایبەت تەخا رەوشەنبیر و سۆفییان ڤە كارەكێ پیرۆز و گرنگ بوویە.
دهێتە زانین ل سنۆرێ دەڤەردارییا ئامێدیێ زێدەتری 120 جهێن شوونواری هەنە، ژ وان ژی: 57 ژ لایێ رێڤەبەرییا شوونواران ڤە هاتینە تۆماركرن و ئەڤ مزگەفتە ژی ئێكە ژ وان جهێن تۆماركری.
