ملیار دۆلار بۆ هه‌رێما كوردستانێ دێ هێن
ئەڤرۆ نیوز:
ل ناڤه‌راستا هه‌یڤا بهێت گرێبه‌ستێن كۆمپانیا رۆسنه‌فت یا رۆسی ل گه‌ل هه‌رێما كوردستانێ دێ چیته دوارێ بجهئینانێ دا، به‌رپرسه‌ك ژى دبێژیت كۆمپانیا ناڤبرى دێ ملیار دۆلاران ده‌ته حوكمه‌تا هه‌رێمێ.
دكتۆر ئاراس خوشناو سه‌رۆكێ سه‌نته‌رێ ڤه‌كۆلین وپێزانینێن ستراتیژى ل كوردستانێ بۆ باس گۆت ل دووڤ وێ رێككه‌فتنا هاتیه كرن، ل ناڤه‌راستا هه‌یڤا داهاتى گرێبه‌ستا رۆسنه‌فت دبوارێ په‌ترۆل وگازێ دا ل كوردستانێ دێ چیته دوارێ بجهئینانێ دا.
خویاكر ژی، ل دووڤ وێ گرێبه‌ستێ ل ده‌ستپێكێ كۆمپانیا ناڤبری دێ ملیار دۆلاران ده‌ته حوكمه‌تا هه‌رێما كوردستانێ وئه‌ڤ پاره ل مه‌ها داهاتێ دێ هێته دان.
ل دووڤ پێزانینێن باس، پشتى دانا وان ملیار دۆلاران، ل دووڤ هه‌مان گرێبه‌ست كۆمپانیا رۆس نه‌فت دێ دو ملیار دۆلارێن دی ژی ده‌ته حوكمه‌تا هه‌رێمێ كو پشكه‌ك ژ وی پاره‌ی دێ بۆ بانكان هێته دان و پشكه‌ك ژی دێ بۆ قه‌ر و پرۆژان بیت.
كۆمپانیا رۆسنه‌فت ل مه‌ها شوباتا 2017 رێككه‌فتینه‌ك ل گه‌ل هه‌رێما كوردستانێ ئیمزاكریه بۆ كڕینا په‌ترۆلا خام ژ هه‌رێمێ ول مه‌ها خزیرانا 2017 هه‌ردولا گرێبه‌سته‌ك ئه‌نجامدا كو ل دووڤ وێ گرێبه‌ستێ كۆمپانیا رۆسی دێ بۆریێن په‌ترۆلێ وغازێ راكێشیت وكاری ژی ل هژماره‌كا بیرێن په‌ترۆلی كه‌ت. ودێ بۆریا غازێ بۆ بكارخستنا ویستگه‌هێن به‌رهه‌مئینانا كاره‌بێ وسه‌رجه‌م كارگه‌هێن ناڤخوه‌یی یێن هه‌رێمێ دابین كه‌ت ودچه‌ند سالێن داهاتی دا دێ غازا هه‌رێمێ بۆ بازارێن توركیا و ئورۆپا هنارده‌كه‌ت كو هێلێن وێ بۆریا غازێ دێ زێده‌تر ژ 30 ملیار پیێ سێجاركی ژ غازا سروشتی هنارده‌كه‌ت.