مه‌ترسیا هاتنه‌خوار یا به‌ران ل سه‌ر دو هزار خێزانێن ئاكرێ يا هه‌ى
ئه‌ڤرۆ نیوز ، نه‌وزاد هلۆرى:
باژێرێ ئاكرێ ب سرۆشتێ خوه ل جهه‌كێ بلند هاتیه چێكرن ب تایبه‌تى چه‌ند كولانێن كو دكه‌ڤنه بن كه‌لها ئاكرێ و كه‌لا كه‌ڤنارا ئاكرێ، ئه‌ڤ چه‌نده بوویه ئه‌گه‌ر كو دوه‌رزێ زڤستانێ و ل ده‌مێ ئه‌نجامدانا ئاهه‌نگان به‌ر بهێنه خوارێ و مه‌ترسى ل سه‌ر ژیانا وهلاتیان درۆست ببیت.
ئه‌نوه‌ر مه‌حموود، ئێكه ژ وه‌لاتیێن ئاكرێ دیاركر كو د وه‌رزێ زڤستانێ دا مه‌ترسى ل سه‌ر ژیانا وان په‌یدا دبیت ب هاتنا خوارا به‌ران ژ كه‌لها ئاكرێ و بۆ ئه‌ڤرۆ نیوز گۆت” گه‌له‌ك جاران ل ده‌مێ بارینا به‌فرو بارانان، یان ژى ئه‌نجامدانا هه‌لكه‌فت و ئاهه‌نگێن نه‌ته‌وى و جڤاكى ب تایبه‌تى نه‌وروزێ، ده‌مێ كو وه‌لاتى سه‌ردكه‌ڤنه كه‌لها ئاكرێ به‌ر ب سه‌ر مالێن مه‌دا دهێنه خوارودبنه مه‌ترسى ل سه‌ر ژیانا مه ب تایبه‌تى زارۆكان”.
ئه‌نوه‌رى زێده‌تر گۆت” چه‌ندین جاران جهێن شوله‌ژێ هاتینه ئاگه‌هداركرن ل د ۆرهاتنه‌خوارا به‌ران، به‌لێ هه‌تا نها چو دیار نینه ، دخوازین چاره‌سه‌ریه‌ك بهێته‌كرن داكو ئه‌م و زارۆكێن مه ژ مه‌ترسیا به‌ران رزگار ببین”.
بلند رزا زێبارى، سه‌رۆكێ باژێرڤانیا ئاكرێ بۆ ئه‌ڤرۆ نیوز گۆت”راسته هاتنه‌خوارا به‌ران مه‌ترسى ل سه‌ر ژیانا وهلاتیان يا دروستكرى ، هه‌ر چه‌نده به‌رى نها چه‌ند دیوارێن پالپشت و په‌رژان هاتینه چێكرن كو ئێدى به‌ر نه‌هێنه‌خوار، به‌لێ دیاره ل ئاستێ پێدڤى نه‌بوویه و پێدڤى ب درۆستكرنا زێده‌تر یا په‌رژان و دیوارێن پالپشته”.
بلندى گۆت ژى” دپلاندایه كو زێده‌تر په‌رژان و دیوار ل ره‌خ و رویێن كه‌لها ئاكرێ و چه‌ند جهه‌كێن دى بهێنه چێكرن ، به‌لێ قه‌یرانا دارایى يا بوویه ئه‌گه‌ر كو كارتێكرن ل سه‌ر درۆستكرنا وان بهێته‌كرن”.
ب گۆره‌ى پێزانينان، چه‌ند جهه‌كێن كولانێن گوره‌ڤا و كه‌ها ئاكرێ و چوسته‌یان پێدڤى ب دیوارێن پالپشت و په‌رژانان هه‌یه كو نێزیكى دو هزار خێزانان بخوه‌ڤه دگریت.
